Construccion a cuminsa riba e prome di e 10 veldnan di futbol 

ORANJESTAD – E siman nobo di trabou a inicia cu un momento di satisfaccion y progreso pa nos pais. Prome Minister Mike Eman a acudi na Bushiri pa marca inicio di construccion di e prome veld di bala den bario di FCCA. “Nos deseo como Gobierno ta pa den tur area di vivienda rond di Aruba, pero sigur casnan di pueblo, tin mas oportunidad di recreacion y haci deporte,” Eman a expresa. E veld di yerba artificial ta keda cla den e proximo cuater pa cinco luna. 160 mucha, hoben y hoben adulto cu ta biba den e compleho aki por haci uso di dje.

Esaki ta un proyecto cu tabatin ya algun tempo trahando riba dje y finalmente por mira cu e construccion fisico a cuminsa. Prome Minister ta gradici tur esnan envolvi manera directiva di FCCA, BoBario y DOW. E ta representa e realisacion di un deseo grandi di parti di e habitantenan. Segun e mandatario, hobennan di Bushiri semper ta pendiente puntrando e mandatario pa e veld di bala cada bes cu e ta topa cu nan na pista di karting.

E compleho di casnan di FCCA na Bushiri no ta e unico pa haya un facilidad di e tipo aki. “Gobierno a drenta den un dialogo cu FCCA y un cantidad di bario caminda FCCA tin hopi cas riba dje ta bay  desaroya canchanan di futbol di yerba artificial manera tin aworaki na Jaburibari, Brazil, Britania y pronto RCA,”  Prome Minister Mike Eman a splica. “Gobierno cu FCCA kier introduci probablemente un cantidad di 10 den tur e barionan di Aruba. Esaki ta un di e promenan y nos ta contento.”

Pa Gabinete Mike Eman II esaki ta importante pasobra e hobennan ta haya un luga pa nan distrae nan mes na un manera positivo. Actualmente ta trahando riba e muraya cu ta bay sirbi como fundeshi pa despues instala e sistema di dreinahe cu ta percura pa ora awa yobe, e tin caminda di bay. Su tras lo basha e vloer di beton, sigui pa un capa di piedra y finalmente e yerba artificial. Tambe ta bay construi un heki rond di e veld pa asina bala no ta bay riba caminda y proteha e hobennan ora di hunga.

“Nos ta hopi contento. Pabien na pueblo di Bushiri,” Eman a bisa. “Algo hopi importante pa e hobennan di Aruba. Manera nos ta bisa semper, ainda falta; esaki ta un di e prome den un bario di FCCA.” E mandatario ta pura pa ta bek ora di instalacion di yerba sigui pa apertura di e veld.

Una bes cla, FCCA ta continua cu mantencion diario di e facilidad. Hunto cu oficina di BoBario ta bay organisa wega y torneonan regularmente, pero kier tambe crea un structura caminda e propio habitantenan di e bario ta tuma responsabilidadnan y haci’e nan mes. Eman: “E existencia y sostenibilidad di e proyecto aki ta hopi grandi pasobra bo a trah’e den un bario caminda tin hopi hoben y hopi deseo.”

Expresionnan haci den e articulo aki no necesariamente ta refleha opinion di ArenaPoliti.co