“E agenda di sostebilidad a habri porta pa Aruba yega riba plataformanan internacional manera Nacionnan Uni unda nos ta comparti nos vision, logronan y tambe retonan”

ORANJESTAD - Diamars a tuma luga e ceremonia di aña parlamentario nobo. Esaki na Aruba ta tradicionalmente riba e di dos diamars di luna di september y na Hulanda riba e di tres diamars di luna di september, e asina yama Prinsjesdag. Gobernador di Aruba Fredis Refunjol a duna su discurso como representante di Su Mahestad Rey Willem-Alexander y cabes di gobierno di Aruba. El a inicia esaki bisando cu p’e ta un honor di por efectua, manera Constitucion ta prescribi, apertura di aña parlamentario 2015-2016 y na mes momento inicio di un periodo unda Aruba ta tuma un paso mas den direccion di sostenibilidad.  Gobernador a enfoca riba temanan manera sostenibildad, calidad di bida, finanzas publico, turismo y desaroyo economia. Tambe el a rechasa e actonan di violencia cu recientemente a tuma luga. Pa loke ta sostenibilidad Gobernador Refunjol a bisa lo siguiente.  

“Den e ultimo añanan Gobierno di Aruba a duna prioridad na mehora y renoba nos calidad di bida; revitalisa nos barionan y nos centro di ciudad; nos scolnan y areanan publico. Gobierno di Aruba a sa di duna sosten na esnan mas vulnerabel den nos comunidad y a ehecuta programanan di formacion social pa yuda fortifica nos sociedad. Proyectonan di energia renobabel ta den pleno ehecucion. E prome exitonan den comberti Aruba den un centro di conocemento y un brug pa negoshi entre ambos continente ya ta visibel.”

Gobernador den su discurso a bisa cu e deseo y necesidad di paisnan rond mundo, specialmente islanan chikito den desaroyo, pa haci e transicion di fuentenan di energia convencional pa logra reduci nan dependencia energia fosil y evita e daño na medio ambiente ta den pleno realisacion na Aruba. “E agenda aki a habri porta pa Aruba yega riba plataformanan internacional manera Nacionnan Uni unda nos ta comparti nos vision, logronan y tambe retonan. E concepto di sostenibilidad ta expande su mes riba tur tereno, tambe esun di finanzas publico. Cu e fin pa yega na finanzas publico sostenibel den un tempo relativamente cortico – sin causa desbalansenan economico, laboral y social – Gobierno ta sigui tuma e pasonan necesario pa yega na e punto di Presupuestonan Balansa. Hunto cu parlamento, nos a regla nos propio supervision financiero temporal segun normanan cu nos mes a stipula. Mescos cu otro leynan cu a wordo introduci den cuadro di desaroyonan global pa crea un sistema financiero mas sano, controlabel y transparente, Gobierno di Aruba a fortifica e Colegionan Halto di Estado manera Parlamento, Contraloria General, Conseho Consultativo y a sigui inverti den nos sistema hudicial. Esaki a haci nos un bes mas ehempel di un pais, cu a pesar di su tamaño chikito, ta hiba un maneho moderno unda cu "checks and balances" necesario y responsabilisacion debido pa sigura bon funcionamento di nos estado di derecho, ta mehora cada aña.” Gobernador a expresa cu manera inicio di tur periodo, e momento aki ta yena cu optimismo, fe y speransa pa logra e metanan cu Aruba a pone su dilanti.

Expresionnan haci den e articulo aki no necesariamente ta refleha opinion di ArenaPoliti.co