“E base di democracia ta debate y dialogo” 

ORANJESTAD- Mescos cu hopi Gobernador Refunjol den su discurso a duna muestra di su rechaso den forma categorico di e actonan di violencia y vandalismo cu a tuma luga recientemente na Parlamento. El a bisa cu den institucionnan caminda ta traha activamente pa mehoracion di nos sociedad, por haya nan mes den camponan di tension unda cu nan mester demostra, no solamente nan resistencia y continuidad, pero tambe nan poder di adaptacion pa sirbi e necesidadnan di nan miembronan.

“Un asamblea di representantenan di pueblo den pleno sesion ta simbolo di nos autonomia, nos autodeterminacion y nos estado di derecho. E ta un convocacion democratico cu no por sucumbi pa menasanan di pafo, ni tampoco na factornan externo cu kier stroba deliberadamente un proceso independiente.”

“Durante e aña parlamentario nobo aki ta inicia celebracion di e di trinta aniversario di nos Status Aparte. Parlamento di Aruba ta e representante real di e pueblo Arubano y alabes ta forma parti integral di e orden constitucional di Reino Hulandes. Eynan, miembronan eligi door di pueblo pa sirbi henter pueblo, tin e tarea pa percura pa e diferencianan di opinion cu ta existi den tur comunidad wordo vocifera sin cu nan mester wordo comberti den division di nos pueblo. E responsabilidad unico cu un Parlamento tin y e instrumentonan constitucional exclusivo cu e tin na su disposicion, semper, pero semper mester ta na servicio di nos pais y nos pueblo. Nan mester sirbi pa reconoce y integra e diferente puntonan di bista cu ta biba den comunidad riba tur tema. Tur, pero tur otro interes ta completamente subordina na esaki. “Refunjol a haci un peticion sincero y ferviente na lidernan politico pa guia nan siguidonan, pa e sucesonan recien di division, agresion, violencia y destruccion di propiedad publico, hamas bolbe ripiti. Mas aleu el a bisa cu e combinacion di expresion liber di opinionnan diverso y aceptacion di decisionnan democratico ta esencial pa e stabilidad di pais Aruba como un democracia activo y asertivo. “E base di democracia ta debate y dialogo. Ban uza nos energia pa democraticamente comparti y convivi mas cu otro!”

Expresionnan haci den e articulo aki no necesariamente ta refleha opinion di ArenaPoliti.co