Diabierna tardi Parlamento di Aruba a yama un reunion urgente pa trata e KB di Sint Maarten. MEP no a participa na e reunion aki, y lider di MEP Evelyn Wever-Croes a splica dicon: "na prome lugar pasobra tin hopi otro problemanan mas urgente aki na Aruba pa atende, cuminsando cu e KB di Aruba mes, pero cu AVP no kier trata! Ademas, na mi humilde opinion, Sint Maarten su premier sra. Sarah Wescott tabata demasiado prematuro den duna sosten na Mike Eman den su welga di hamber na juli ultimo, pasobra despues a resulta cu ta Mike Eman mes a entrega nos autonomia, y pues cu e welga di hamber no tabata funda. Nos no kier comete e mesun eror. Nos no conose tur e detayes tras di e KB di Sint Maarten, y nos no ta kere ta responsabel ni prudente pa duna expresion nan al respecto na e momento aki.

Sinembargo nos ta sostene e presion cu ta wordo poni door di tur pais den Reino pa bin cu un geschillenregeling den Reino, cual por cierto ta un iniciativa di MEP mes tempo cu gobiernonan di MEP tabata tin disputa cu Hulanda. Durante mi reunionnan na Hulanda luna pas ami a trata e tema aki tambe cu parlamentarionan di Tweede Kamer y cu Minister Plasterk, y nan tambe ta sostene pa bin un geschillenregeling. Nos ta conbensi cu un geschillenregeling ta trese claridad, y esey ta yuda tur partido.

Nos ta spera cu e disputa na St. Maarten wordo soluciona pronto, poniendo e interes di e pueblo di St. Maarten na prome lugar. Na e momento aki nos pais tin mester di nos, nos ta e unico pais den Reino cu no tin presupuesto pa 2014, nos ta e unico pais den Reino na borde di bancarota, y esey ta afectando e calidad di bida di hopi hende na Aruba. Eynan nos prioridad ta, y nos ta spera cu AVP tambe lo sa di pone su prioridad eynan", segun Evelyn Wever-Croes