STA CRUZ -- Den conferencia di prensa di MEP, lider di MEP Evelyn Wever-Croes a elabora riba nan ausencia den Parlamento. "Nos a anuncia cu bo lo no mira fraccion di MEP na parlamento. Siman pasa diamars tawata e dia di bisti sombre y handschoen cual nos a laga sa bon cla cu nos lugar ta den pueblo ta scucha kiko ta pasando pa nos por ta e oido y voz di pueblo. Y cu nos no ta participle na ningun show y farza. E weganan aki mester caba.
Desde e dia ey parlamento no a yama NINGUN reunión publico mas, y esey a duna nos mas espacio pa ta den pueblo y scucha realmente Kiko ta e dolornan di nos pueblo.
Nos a reuni cu instancianan oficial tambe, manera Banco Central, IMSAN, scolnan, y nos a tuma hopi tempo pa papia cu esnan cu a wordo afecta pa e parkeermeternan. Mi mester bisa cu mi ta contento di mira cu parlamentarionan di AVP a cuminsa cana nos tras, y tambe a Sali y bai reuni cu Baqnco Central. Mi ta invita nan bai cana den caya Betico Croes pa nan mes scucha e dolornan cu e parkeermeternan a ocasiona.

Durante e dianan cu a pasa nos a tende parlamentarionan di AVP yora cu nos no tey den Parlamento pero no tawatin ningun reunion publico kiermeen no tawatin motibo pa keha. Reunionnan di comisión cu nos a haya necesario, nos a atende, y otronan cu nos no por bisa nada toch, ni cambia nada toch, tanto bal nos tey of lag'i tey. Pero importante si pa remarca ta cu politiconan di AVP a realisa cu loke nos ta hasiendo ta bon.

Durante tur e dianan cu a pasa nos a hasi mucho mas, compara cu e parlamentarionan di AVP cu a keda sinta den airco y hunga riba Facebook. Nos a tene reunionnan importante cu banco central, nos a bishita scolnan, nos a reuni na IMSAN y locual tabata hopi importante, nos a bishita  caya Betico Croes y otro establecimentonan relaciona cu parkeermeters. Nos ta scucha for di pueblo kiko ta e dolornan y preocupacion pa despues nos por bin parlamento trece solucionan.

Si bo compara loke AVP y MEP a hasi e ultimo siman aki, bo lo por saca conclusion cu MEP ta hopi mas serca di pueblo y ta traha pa trese solucion pa pueblo. Nos no a keda sapatia manera AVP a hasi cu nos ausencia. Pueblo ta desea pe por wordo scucha y ta aprecia esaki.  
Presidente di parlamento a reclama cu fraccion di MEP no tabata presenta na e reunion pa reparti trabou. Riba esaki e líder di MEP a laga sa, ki trabo unan kier reparti? Si nunca MEP ta haya algo di bisa toch? Si nan a kita tur presidencia di comisionan di nos toch? Además, nos a participa, y nos a indica e cambionan den nos comisión. E presidente di parlamento mester stop di ganja, e mester kita su hilchinan, bisti su keds y cuminsa cana den pueblo. E ora e por realmente hasi un trabou como representante di pueblo.

Expresionnan haci den e articulo aki no necesariamente ta refleha opinion di ArenaPoliti.co