Movimiento Electoral di Pueblo (MEP) ta den proceso - di acuerdo cu su statutonan - preparando  pa su  Congreso di dia 27 di September proximo, unda MEP lo bay scoge su Lider. Sin duda algun mirando atras riba e trabaonan valioso cu e Lider  di MEP actual, sra. Evelyn Wever-Croes a bin ta desplegando, no ta keda espacio pa duda cu Evelyn Wever-Croes lo keda re-eligi como Lider di MEP. Un Dama amabel y intachabel, yena cu energia positivo cu un amor incondicional pa su famia y henter e pueblo di Aruba. Evelyn Wever-Croes alavez tin un preparacion amplio y a demostra su caracter y firmesa trahando tanto den sector priva como sector publico. Mi tabata tin e honor di a traha cu Evelyn den e proceso pa restructura partido MEP, pero tambe asisti na e diferente reunionnan y mester bisa cu e vision cu Evelyn Wever-Croes tin ta uno fenomenal. Su manera tactico di dirigi reunion y busca solucionnan real pa cada problema ta sobresali.  Tambe mester remarca e pasenshi y dedicacion cu Evelyn Wever-Croes tin pa atende su pueblo, entre otro yenando papelnan di belasting gratuitamente tur siman na Cede di MEP y aportando tambe cu tur sorto di cartanan di bezwaar pa cu pueblo, ta hechonan cu mester ser elogia. Evelyn Wever-Croes ta domina e materia di finanza den forma amplio, unda pa mas di 10 aña el’a sirbi su pais na timon di e Departamento di Finanza. Pues resumiendo, e experiencia, amor, pasion, dedicacion, disciplina pero sigur e determinacion cu sra. Evelyn Wever-Croes tin ta haci cu indiscutiblemente Evelyn Wever-Croes lo wordo re-eligi como Lider di MEP pa guia e partido y haci’e un biaha mas e partido mas grandi di Aruba cu un victoria absoluto. Evelyn Wever-Croes merecidamente, nos promer Dama como Promer Minister den historia politico di Aruba.

Expresionnan haci den e articulo aki no necesariamente ta refleha opinion di ArenaPoliti.co