Den conferencia di prensa di Diaranson ultimo Parlamentario, sr. Guillfred Besaril, a elabora riba e bishitanan haci door di e Fraccion di MEP den centro di Oranjestad. Parlamentario Besaril a declara lo siguiente:

"Nos a combersa cu tanto e comerciantenan como e trahadornan riba e situacion di Parkeermeters den caya Betico Croes y vecindario. Ademas di nan contribucion, nos a combersa, na un manera espontanio, cu diferente cliente cu tabata di bishita den nos Centro di Ciudad. Pa nos cu ta representa Pueblo como Parlamentario, e ta importante pa ta constantemente na altura di loke ta convivi den nos comunidad. Pues scucha y duna oido na Pueblo, pa trata na atende cu e diferente preocupacionan, ta lo más importante".

Un di e aspectonan cu a lanta preocupacion di biaha serca Parlamentario Besaril na momento di scucha esnan cu a aserca y combersa cu e Fraccion, tabata e tema di siguridad den nos Centro di Ciudad. E Parlamentario a sigui elabora:

"T'asina cu e mayoria di esnan cu ta traha den caya Betico Croes y vecindario, ta gana entre sueldo minimo y 2100 Florin pa luna. Pa es motibo aki, 75 Florin pa luna (esta 900 Florin pa aña) pa e supuesto privilegio na parkeer nan auto mas serca di nan luga trabow, ta un carga financiero cu dificilmente nan por absorbe. Ta pa es motibo aki, e gran mayoria ta opta na staciona nan vehiculo na espacionan cu awor ta resulta di ta demaciado leu.

Ademas di ta leu pa cana, ta keda e pregunta: "Con bo lo hasi pa atende cu bo propiedad despues cu bo a pone na un Linear Park of por ehempel na e tereno dilanti Maduro Travel na Boulevard?" Ta trata di un situacion den cual imposibel bo tin un bista riba bo propiedad (auto). Ademas di e punto aki, ta keda e pregunta "CON" na garantisa bo siguridad personal na momento di cana bai bek na unda bo auto ta staciona? Vooral si ta hende cu ta traha warda of despues di 8'or di anochi! Aki ta camínda nos Fraccion ta compronde e empleadonan cu ta labora den e casinonan den vecindario cu ta caba na warda den oranan di marduga!

Esaki por tin como consecuencia cu den oranan laat di anochi, tin hende ta haya nan mes cu un situacion cu na final lo por pone nan mesun siguridad na peliger. Akinan por mira cu e introduccion di e ley di Parkeermeters no solamente a afecta e parti economico, pero sin mas a afecta e bida diario di di Pueblo. E ley a bai simplemente sin tene cuenta cu diferente aspecto di siguridad pa esnan cu ta traha den Caya Betico Croes y vecindario. E implementacion di e proyecto di Parkeermeters tabata sumamente mal planifica, Punto! No tin un plan "B" pa yuda solventa e situacion y esey ta bisa suficiente!

Nos ta haci un yamada na autoridad (Polis) pa presta mucho mas atencion na e aspecto aki y na intensifica e systema di patruyahe rond di e area di Oranjestad. Si, nos sa cu e presupuesto di nos Pais tin su limitacionan. Nos como Fraccion ta lamenta profundamente cu gobierno di Mike Eman no ta serio at all ora ta trata siguridad di Pueblo. Si ta pa Partido MEP, siguridad di Pueblo y Cuerpo Policial lo a haña un atencion special, man cu nan merce! Pero e introducion di parkeermeters ta demostra un biaha mas con serio e gobierno aki ta y cu Pueblo na tur nivel ta pa nan cuenta. Mane un yiu sin Mama!" Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co