E Gobierno di Mike Eman ta sigui haci erornan di un magnitud inmenso cu ta resulta cu tiendanan cu pa decadanan a yuda nos economia, ta cera nan portanan definitivamente.
Den un temporada di crisis, causa door di un Gobierno incompetente di Mike Eman, e poder di compra di pueblo a baha drasticamente. Pa maneha finansas publico den un temporada di crisis na un manera duradero, ta exigi pa bo cuminsa corta den bo mesun cartera prome.
Enbes di malgasta placa di pueblo y nombra 9 Minister, bo mester mustra cu bo ta respeta placa di pueblo y baha di 7 pa 5 Minister. Enbes di subi coriente cu 15 procent, bo mester a baha bo cantidad di coordinadornan cu 30%. Enbes di introduci medida #16, esta e parkeermeters, bo por a parkeer bo mesun gastonan di biahe pa conferencianan di UN cu no ta yuda bo pueblo cu nada.

Wilhelminastraat ya caba a haya e nomber di 'cariño' Wielklem-ina-straat. Na un isla chikito cu un economia vulnerabel, bo no por bin implementa medidanan di paisnan grandi. Asina AVP a logra perhudica pueblo y comerciantenan un biaha mas! Un economia delicado mester wordo atende door di specialistanan. Nos a wak kico a pasa den menos cu un luna, cu despues di añas di 'construccion' den Caya Betico Croes awor a bin e ultimo golpi di gracia pa e negoshinan: parkeo paga! Pero wielklem y parkeermeters, no ta e solucion. Ta ora pa pueblo exigi desmantelacion di e Gobierno di Mike Eman II, cu ta destrui nos pais cu nan vision descabeya. Pronto MEP lo introduci su vision cu lo laga Solo sali pa nos tur.

Expresionnan haci den e articulo aki no necesariamente ta refleha opinion di ArenaPoliti.co