Cu e gobierno di AVP ta un gobierno yena di triki y maldad, tur hende ta na altura di esaki caba. Hecho ta cu desde cu nan a sinta na November 2009, nan ta manipula tur dia cu informacion y den mayoria caso nan ta tene e informacionnan atras, scondi y secreto mustrando cu nan no ta transparente den ehecucion di nan maneho. Asina nos por a mira den e siman ultimo con Minister di Finansa Angel Bermudez tambe a cuminsa duna informacion mitar mitar na comunidad. Den un declaracion haci na prensa e minister a trece padilanti cu promer cu e aña aki termina, su gobierno lo bin cu 5 concepto di ley pa Parlamento aproba y esakinan ta:
1. Presupuesto 2016, 2. Presupuesto supletorio 2015, 3. Ley di Reforma Fiscal (ABB), 4. Facilidad fiscal pa comercio y 5. Impuesto riba number di auto.

Un medida cruel
Sinembargo ta hopi straño si e informacion manipula aki, ya cu e minister no ta menciona y aparentemente a ''lubida" completamente cu su gobierno a acorda cu Hulanda y CFT cu nan lo introduci tambe un Financial Transfer Tax entrante januari 2016 y esaki como parti di e 24 medidanan cruel cu nan lo impone riba lomba di pueblo. E belasting aki (medida nr. 11) ta pa financia tur e proyectonan PPP (2.4 biyon florin!) cu no tin ningun prioridad na e momento aki. Sinembargo nan a priminti Hulanda cu cuminsando na 2016 nan lo ranca 52.3 miyon florin, na 2017: 78.3 miyon y na 2018: 78.7 miyon florin for di cartera di pueblo y esaki na momento cu pueblo mester haci cualkier transferencia bancario/financiero. E Financial Transfer Tax ta un medida cruel, caminda cualkier transferencia cu e ciudadano haci mediante su transaccionnan bancario, standing orders, deposita y lanta placa y paga cu su carchi di bancomatico, gobierno cu su dedenan largo ta bay raspa den su cartera.

Impacto riba economia
Mester remarca si cu despues di 2018 lo tin 25 aña mas pa paga pa e proyectonan PPP di Mike Eman y su gobierno y esaki na un suma di 93 miyon florin pa aña! Hecho ta cu tur instancia local y internacional, manera Banco Central, Asosacion di Banconan, Camara di Comercio, ATIA y tambe IMF y CFT a conseha gobierno pa no introduci e medida cruel aki, ya cu esaki lo tin un impacto sumamente negativo riba nos economia cu ya ta den deterioro caba. Awor e pregunta clave pa e siman aki ta, porfin Gabinete Mike Eman lo a scucha e consehonan valioso di tur e instancianan renombra aki y awor a deshaci di e idea di introduci e Financial Transfer Tax entrante 2016? Si esaki ta e caso, con Gabinete Eman lo bende esaki na CAFT y na gobierno di Reino? Of talvez, manera ladron den anochi, nan lo suta pueblo y pasa e medida aki toch den oranan di marduga di bispo di Pasco/Aña Nobo, esta na momento cu pueblo ta drumi?
Sin duda, tempo lo ta nos mihor maestro den henter e misterio aki!

Expresionnan haci den e articulo aki no necesariamente ta refleha opinion di ArenaPoliti.co