Durante tratamento di presupuesto 2015 fraccion MEP a cuestiona e sumanan cu ta bai wordo inverti den entre otro green corridor. Den e reunion a referi na un tabel cu ta contene datonan di Centrale bank suministra na CFT di diferente projectonan ppp. Oposicion a confronta Minister Sevinger cu e projecto di Green Corridor lo ta costando pueblo di aruba 732,5 miyon y cu esaki mester wordo paga durante un periodo di 25 aña x 29.3 miyon. Na su lugar Minister Sevinger a para ariba cu no sa for di unda oposicion a saka e suma ey. A resulta despues cu su mes Infra team ta esun cu no a duna informacion corecto pasobra Banco Central a manda un carta informando parlamento cu e periodo di pago pa Green Corridor ta di 18 aña x 16.5 miyon = 297 miyon florin.

Poco siman atras Minister Sevinger a bolbe anuncia un otro projecto ppp den caso aki Watty Vos Boulevard. E minister a informa cu e projecto aki lo costa total 440 miyon florin cual lo wordo paga den 20 aña cu un suma anual di 22 miyon. Remarcabel ta e hecho cu tin un discrepancia atrobe constata den e sumanan cu a presenta na CFT. Informacion suministra ta indica cu e inversion inicial pa e boulevard lo ta di 330 miyon florin. Tambe e datonan cu CBA tin ta indica un periodo di pago mucho mas largo y suma diferente. E tabel ta mustra cu e projecto lo bai wordo paga den 25 aña cu un suma di 32.6 miyon florin totalisando 815 miyon florin! Dus aparentemente CBA lo a hasi eror atrobe? Of Infrateam lo a bolbe suministra informacion incorecto? Si pa green corridor CBA a manda un carta indicando cu info ricibi di infra team tawata incorecto lo esei mester te caso tambe pa Watty Vos Blvd.

Realidad ta si cu anualmente pueblo mester bai paga alrededor di 40 miyon florin pa e dos projectonan aki cu al parecer ta costando hunto 737 miyon florin. E placa aki mester sali sea 1) for di presupuesto general di pais Aruba of 2) un cobransa/ belasting nobo. Cualkier di dos ta di pueblo e ta sali toch. Pa pueblo su informacion Gabinete Eman kier introduci un financial transfer tax e aña aki ainda pero door cu gremionan a rechaza e idea nan a pospone pa 2016. Enfasis mester wordo poni riba e hecho cu bou Fondo Desaroyo Aruba nunca antes pueblo tawata wordo cobra extra pa por a traha projecto y diripiente awor si? Punto central den esaki ta cu mal maneho financiero di Gabinete Eman no a ni laga placa resta pa por inverti y ta pesei ta "saca wowo" di tur cuidadano di Aruba. Loke Gabinete Eman y fraccion AVP no ta bisa ta cu projectonan PPP ta continua pa pueblo paga e cuenta!

Expresionnan haci den e articulo aki no necesariamente ta refleha opinion di ArenaPoliti.co