Diescuater rotonde rond di Aruba ta haya decoracion di Pasco  

Cada ekipo di compania y grupo den bario mester enfoca riba un tema  

ORANJESTAD – Cu cendemento di e luznan riba Plaza Las Americas diaranson anochi, Gabinete Mike Eman II a duna inicio na e temporada di fin di aña 2015. Loke rapidamente a bira un tradicion, ta drenta su di cuater aña consecutivo. Honor pa cende e luznan tabata den man di Frederik Tromp, miho conoci como ‘Frei’ kende ta dirigi e contratista cu a percura pa e trabounan di embeyecemento y mantencion, a tuma luga. Prome Minister Mike Eman a gradici personalmente tur esnan cu a haci e anochi, un realidad. El a gradici trahadonan di DOW, Elmar, BoBario, como tambe cantantenan infantil y grupo di gaita cu a entretene esnan presente.

Den total, ta bay decora 14 rotonde rond di Aruba y nan ta programa pa inaugura entre 14 di october y 28 di november. A dicidi pa cuminsa un poco mas tempran cu biahanan anterior, pa asina pueblo por disfruta di e ambiente cu e decoracion ta trece, durante un periodo mas largo, manera Raoul Gravenstijn di oficina di BoBario a splica. “E biaha aki a cuminsa na rotonde di Las Americas. Gobierno ta esun pa duna ehempel y a cuminsa trempan pa asina hendenan haya mas goso di e dianan di fiesta,” Gravenstijn a splica.

E rotonde di Las Americas tin un kerstboom masha grandi cu ta consisti di 56 bala berde y cora, ademas di otro decoracionnan rond di e matanan. Durante dos siman, diferente ekipo di seccion WWK di Departamento di Obranan Publico y ademas, Elmar a traha hunto. Sr. Tromp tambe a gradici coleganan di grupo di Randy Falconi y miembronan di BoBario. “E proyectonan aki ta bon y BoBario ta haciendo un bon trabou. MI ta contento cu nan ta haci e esfuerso y mi ta contento di por yuda nan te unda cu mi por,” Sr. Tromp a bisa cu satisfaccion.

Peticionnan pa adopta un rotonde den temporada di fin di aña ta cuminsa drenta ya caba despues di Carnaval. Gravenstijn, como trahado comunitario di proyecto BoBario hunto cu otro coleganan ta registra tur peticion y bay over na evalua e tema, plan y material cu nan ta propone. Tambe ta purba acomoda cada compania cu un scol of grupo den bario pa haci e trabou hunto. Tambe, di nan parti, ta mas exigente pa enfoca riba un tema y crea algo special cune, no djis pone luz pa loco.

Pueblo su reaccion ta tremendo y nan ta hopi critico. Pesey mes, e exigencianan a subi. “Si un luz paga of un Santa Claus cay, nan ta bombardea nos telefon pa bisa. Tambe si e no ta bon decora, nos lo haya tende di e keho; ainda 25 di December anochi nos ta haya reaccion. Eynan bo ta wak cu e pueblo ta pendiente,” asina Gravenstijn ta conta.

BoBario cu ta proyecto di Ministerio di Asuntonan General, Ciencia, Innovacion y Desaroyo Duradero bou liderazgo di Prome Minister Mike Eman ta invita pueblo di Aruba pa keda pendiente ya cu cada rotonde lo tin su ambiente. Por ehempel, rotonde di Pos Chikito ta adopta y tin algo hopi special prepara en conexion cu nan 325 aniversario di existencia. Ponton y Paradera tambe tin plannan grandi. “Ta pidi pa sostene e boluntarionan y sigur e muchanan ora nan ta trahando. E ta un inversion, hopi trabou y stress y ban yuda cuida loke nan a construi,” Gravenstijn a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co