Jan de Ruijter: 'Nos turismo: E fase final y decisivo den e casonan dilanti mesa berde encuanto e Hard Rock Hotel'

Publica: Diasabra, 17 oktober 2015 | Autor: Redaccion

Mescos cu prome minister sr. Mike Eman, segun su propio palabranan, a haye dilanti di un dilema relaciona cu nos refineria, mi persona a hayami para dilanti di e dilema di sea duna publicidad na e sentencia di Hof den mi caso contra Ministerio Publico/Otmar Oduber/Bushiri-Hard Rock, of no.

E diferencia sinembargo ta sinta den e escohencia di e dos opcionnan den ambos caso: Mike Eman mester a escohe entre interes di Pueblo di Aruba y interesnan particular.

Mi persona mester a djis dicidi si mi mester a duna publicidad inmediato na e sentencia di dia 15 di october ultimo, of – pa respet pa Corte/Hof - warda un rato cu esaki.

Duna publicidad, of no?

Manera ta conoci, diarazon ultimo, dia 14 di october 2015, Hof na Aruba a trata mi keho contra e decision di Ministerio Publico pa pone den buki di olvido (“seponeer”) mi keho anterior contra minister di Turismo Otmar Oduber.

Lagami cuminza na splica mi dilema: despues cu e caso a tuma lugar den corte, mi a tuma e decision pa no duna declaracionnan encuanto e caso, esaki como cortesia y pa respet pa e miembronan di Hof; ademas mi a considera cu e asunto no tabatin necesidad di sensacion na e momento ey, pero mas bien trankilidad y seriedad.

Sinembargo mes un diarazon anochi mi a cuminza ricibi masha hopi yamada y e-mailnan, unda cu a sali na cla cu algun miembro di Prensa kendenan tambe a atende e caso, ya a plama e noticia di e sentencia via radio y medionan social.

Y di mes esey tabata mag tambe, pasobra tabata trata di un caso publico!

Na e momento ey mi a dicidi pa cambia mi punto di bista.

Awor ta den interes di comunidad Arubano, di Corte, di Ministerio Publico, y di mi mes personalmente, pa comunidad haya e informacionnan corecto encuanto e asunto di Hard Rock, y NO mitad-berdadnan, mentiranan, of speculacionnan inventá.

P’esey tambe mi decision pa publica e informacion aki, unda na mesun momento mi kier pidi un y tur pa no haci un sensacion di e asunto aki, pero pa duna espacio na e investigacion pa esaki por sigui su curso trankilamente.

E caso na Corte

E caso dilanti mesa berde tabata un experiencia grandi pa mi. Tabata prome biaha den mi bida cu mi mes mester a scirbi henter un “pleitnota” den un procedura hudicial, entrega esaki y ademas splike personalmente na e hueznan den Corte.

Aunke mi tabatin tur dato tocante di e caso Hard Rock completamente cla prepara y na mi disposicion, a costami toch 5 dia completo prome cu mi tabata satisfecho cu cada palabra y cada frase, y cu tur punto clave, importante y al caso, a wordo cubri eyden.

E ora ey bo ta haya un sentimento di un pintor of un artista, cu ta keda drecha su pintura sin fin, te ora cu e ta completamente satisfecho cu ne.

Palabranan di compliment so mi tin pa e huesnan den Corte cu a trata e caso, tambe pa e manera cu nan a dunami e espacio pa mi splica mi keho a fondo, sin ningun advertencia pa pura y haci liher, of pa tene cortico!

Despues tabatin un sesion di pregunta y contestacion (“Q & A” – questions and answers), unda mi mester a contesta preguntanan di e hueznan; tabata remarcabel con liher e hueznan tabata sa di percibi e diferencia entre asuntonan principal y asuntonan di menos importancia, y finalmente a haci pregunta tambe na e “advocaat-generaal” di Ministerio Publico cu tambe tabata presente.

E “advocaat-generaal” ta representa Ministerio Publico den casonan den corte superior (Hof).

E veredicto

Durante e sesion di Q. & A. a sali na cla cu e miembronan di Corte tabatin preguntanan cu tabata dificil pa e “advocaat-generaal” contesta, y cu tabata nobo pa esaki.

Corte tabata di opinion cu e preguntanan mester ser contesta, y pues mester ser investiga; e “advocaat-generaal” tabata completamente di acuerdo cu esey.

Despues di un receso cortico, e ora ey mes, pues ainda durante di e caso, a bay di acuerdo cu e oferta di e “advocaat-generaal” pa cancela e “seponering” anterior, y haci un investigacion adicional relaciona cu e preguntanan especifico di Hof.

Por haci pues comosifuera e caso no a tuma lugar, y si mi persona no ta contento cu e investigacion, lo mi por bay back Corte atrobe.

Mi punto di bista

Mi no tabatin ningun problema moral cu mi mes pa skirbi e declaracion aki pa Prensa y pa e comunidad Arubano. Pasobra e caso tabata publico, y e presentenan den sala tambe tin derecho pa conta e sucedido na otro persona, y pues e hendenan di Prensa tambe.

Mi ta sumamente satisfecho cu e resultado aki.

Mi tin tur comprension cu diferente aspectonan di mi “pleitnota” tabata nobo pa e “advocaat-generaal”; berdad ta cu no tabata trata di hechonan nobo, pasobra e puntonan semper tabata parti di mi keho caba, pero pa e “advocaat-generaal”, kende te awor aki no tabata envolvi den e caso Hard Rock, sí nan tabata nobo.

Di cua puntonan ta trata aki especificamentye, lo mi no divulga na e momento tempran aki. Mi ta kere cu esey no ta na ami pa haci.

Durante e investigacion – y esaki principalmente di acuerdo cu mi propio reglanan di etica – lo mi no mag di haci anuncionan tocante e caso, y mi ta spera cu e “advocaat-generaal” lo por haci su investigacion den tur trankilidad y liber di cualkier sensacion.

Cu esey ta parce cu mi deseo a wordo cumpli.

Dia 2 di december 2014 mi a entrega un keho contra minister Oduber y un lista largo di complicenan, y e keho ey ta bay ser trata awor. Exactamente manera mi a spera (“verwacht”).

E fase final a cuminza, y awor husticia mester cana su caminda.

Husticia lo vence, di esey mi ta convenci.

Jan de Ruijter – This email address is being protected from spambots. You need JavaScript enabled to view it.

Aruba, october 16, 2015