Evelyn Wever-Croes (MEP): MEP tambe ta sostene FADA
BAN UNI DEN SIMAN DI CINTA CORA PA UN ARUBA SIN DROGA
ORANJESTAD -- Fraccion di MEP tambe ta uni su mes na e esfuersonan di FADA den e siman di cinta cora. Parlamentarionan di MEP bou di guia di lider di MEP Evelyn Wever-Croes ya a cumpra nan cinta caba, pa asina habri e siman di cinta cora. Tambe a contribui cu t-shirt di e siman.
FADA anualmente ta organisa e siman di cinta cora pa enfoca riba uso y abuso di droga den nos comunidad. E aña aki e lema ta “Count on me, to be drug free.” E cinta cora mes ta un simbolo pa prevencion y educacion cu e meta pa reduci e demanda di e droganan ilegal cu tin. FADA ta usa e campanja aki pa concientisa comunidad den un forma mas atractivo, di e problematica di droga. Ohala cu den seno familiar tur famianan por probecha di e oportunidad aki pa por toca e tema cu nan yiunan y hasi nan conciente di e peligernan cu tin eyfo.
"Mi ta hopi preocupa pa e uso y abuso di droga na Aruba especialmente bou di nos hobennan y awendia tambe bou di nos muchanan. Pesey nos ta sostene FADA den esaki, pasobra mi kier mira mas atencion wordo duna na nos hobennan. Mi kier mira cu tin mas oportunidad pa desaroyo y recreacion sano pa nos muchanan y nos hobennan pa asina tene nan leew di e mal caminda. Mi kier mira e nucleo familiar wordo fortifica pa asina den famia por yuda hobennan cu por bai cai den gara di droga. Mi kier mira mas oportunidad di estudio y empleo pa nos hobennan, pa nan ta exitoso den bida. Y mi ta sigur cu mi ta papia den nomber di tur Mama si mi bisa cu nos yiunan ta e tesoro mas precioso cu Dios por a duna nos, y mescos cu tur Mama mi lo hasi tur lo posibel pa libra nos muchanan y hobennan di man di e sinberguensanan cu kier danja nan bida. Pero mester di compromiso y determinacion, algo cu mi no ta mira den e gobierno aki. Sinembargo mi no ta perde speransa, y mi tin confiansa cu e campanja di FADA lo duna su fruto. Mi ta invita henter comunidad pa duna un aporte na e campanja importante aki" lider di MEP Evelyn Wever-Croes a laga sa.
Expresionnan haci den e articulo aki no necesariamente ta refleha opinion di ArenaPoliti.co