Parlamentario Chris Romero (MEP): Educacion riba addicion ta e mihor forma di prevencion
Ban aporta na FADA su campaña “Siman di Bisti na Locura”
E siman aki FADA ta conmemora e siman di sinta cora. Bistimento di cinta cora ta un manera colectivo cu ta uza internacionalmente pa protesta contra uzo di droga. E termino "droga" ta ser uza pa hasi referencia na sustancianan cu ta provoca un alteracion den e estado di animo di un persona, y cu ta capas di conduci na adiccion.
Lastimamente na Aruba nos por mira cu aña pa aña e demanda y uzo di droga ta yega cifranan alarmante. Y e parti mas preocupante ta ora cu mira muchanan na edadnan hoben cu ta consumiendo diferente tipo di sustancia adictivo. Pa es motibo aki, mi semper a mantene e pensamento cu educando nos hobennan ta e promer paso esencial pa prevencion di uzo y abuso di droga. Informacion ta un condicion necesario ora cu nos papia di prevencion. Aunke riba su mes e no lo ta suficiente, e mester bay man den man di otro strategianan di concientisacion.
Educacion riba droga ta e manera preventivo mas efectivo cu esnan cu ta dirigi e formacion di un mucha tin den nan man pa yuda combati e influencia maligno aki. Nos como adulto responsabel mester por tin e capacidad pa duna nos muchanan e formacion necesario pa nan mes por tin control y decision pa keda leu di cualkier tipo di droga.
Adiccion na droga no solamente ta afecta e famia di e adicto, pero e ta afecta henter un comunidad. Considerando esaki, cada un di nos tin e necesidad pa ta solidario y te hasta activo den e lucha pa combati adiccion na droga. Sea nos ta hasi'e na forma directo of indirecto, cada aporte duna ta nifica un ayudo grandi den e lucha incansable aki.
Algo cu sigur mester reconoce y aplaudi, ta e gran labor cu FADA ta realisando na Aruba pa cu prevencion di uzo di droga. E ta un trabou grandi y cu sigur ta rekeri hopi esfuerso y creatividad pa por capta e atencion di nos hobennan ora di duna nan informacion tocante droga. E importante ta cu e mensahe ta yegando, pero e colaboracion di nos comunidad ta esencial pa por logra e meta.
Laganos tur aporta y forma parti activo di e siman di bisti na locura di FADA. Ami sigur a acepta e reto y mi a bisti na cora. Abo lo acepta e reto tambe?
Expresionnan haci den e articulo aki no necesariamente ta refleha opinion di ArenaPoliti.co