"Prome cu fin di e aña aki lo dicidi pa e cobertura di e Fondo di Pensioen di APFA ta bek na 100%."  Asina Rene Herde', lider di e fraccion di AVP a bisa den fin di siman. Den un reunion di contacto cu empleadonan publico y maestronan di scol, Rene Herde' a splica kico a pasa cu e fondo di pensioen for di aña 2008, kico a haci te awor y kico ta bay sosode awor cu e cambionan cu e ley nobo ta propone. E preocupacion mas grandi di e trahadornan ta ki dia nan pensioen lo ta cubri pa 100% atrobe. Basa riba e informacion cu directiva di APFA a duna siman pasa, por a informa e trahadornan cu e ley nobo ta ensera entre otro un inversion di alrededor di 170 miyon florin cu lo hiba e fondo di pensioen bek na un cobertura di 100% bruto. Den e cuatro añanan cu ta bin e cobertura netto tambe lo subi te na 100%. E didos fase aki lo sosode door di e rendimiento di e fondo mes. Obviamente e informacion aki ta alentador y e trahadornan cu satisfaccion ta bisa cu nan ta contento cu e seguridad aki y nan ta wak unda placa di pueblo ta bay.

REESTRUCTURACION
For di 2008 e fondo di pensioen di empleadonan publico y maestronan di scol a sufri un perdida grandi door di e caida drastico y rapido den inversionnan. Esaki a sosode tur rond di mundo. Pero contrario na loke a sosode den paisnan grandi y chikito rond di mundo, na Aruba gobierno di AVP for di 2009 y e fondo, a scohe pa no corta den e pensioen mensual cu e ex-trahadornan ta haya. Den su lugar a yega na un acuerdo entre gobierno di e fondo di pensioen pa restaura e fondo di pensioen door di restructura esaki, hisa e edad di pensioen y haci inversionnan multimilionario di gobierno pa salba e fondo y sigura e pensioen di pensionadonan. E combinacion di e perdida na 2008/2009 y e falta di atencion di gobierno di MEP, a haci cu na fin di 2009 e fondo no por a cubri su responsabilidadnan mas y tabata core peliger di no por paga e pensioen di pensionadonan. Cu e ley nobo cu lo wordo trata dentro di poco den parlamento di Aruba, lo wak si ta haya aprobacion pa e restructuracion di e fondo, e inversionnan grandi den e fondo y pa completa e acuerdo di restauracion di e fondo.

Pa AVP ta masha importante cu ta restaura e cobertura di e fondo, aunke e ta na un costo hopi halto. E resultado lo ta cu e fondo lo ta solido atrobe y lo sigura e cobertura completo di e pensioen mensual di tur pensionado pa futuro. Ademas e fondo solido aki lo por sigui contribui na entrada sigur di hopi famia y na solidez di nos sistema financiero.

Expresionnan haci den e articulo aki no necesariamente ta refleha opinion di ArenaPoliti.co