E Presupuesto Supletorio a drenta y lo wordo trata pronto. E structura di e presupuesto supletorio ta mescos cu tur otro aña. E ta un resumen di cambionan den suma y cifranan destina pa diferente ministerio y meta den e presupuesto mes. Loke a cambia ta e nomber di e Presupuesto Supletorio. Segun departamento huridico e cambio di e nomber ta pa motibo cu e presupuesto 2014 te ainda no a wordo firma y door di esey e no a bira un ley oficial. Pa e motibo aki a cambia nomber di e Presupuesto Supletorio. E nomber ta awor un "concepto di ley pa cambia un concepto di ley di presupuesto 2014". Su contenido y e meta- esta pa ahusta suma y cifranan di e presupuesto principal di 2014 mes- a keda mescos cu tur otro aña. Esnan cu ta kere cu esey ta haci cu e proceso di firma of no firma e presupuesto, e "KB" y e presion politico riba gobierno di Aruba, ta bira uno legal y corecto, ta masha ekiboca. "Bo no ta legalisa algo ilegal door di cambia su nomber!" Asina Rene Herde', lider di e fraccion di AVP a declara.

NOS TIN PURA
E presupuesto supletorio lo wordo trata den e Comision Central y den e Comision Financiero y Economico di Parlamento pronto, pa despues di haya contesta di gobierno riba e preguntanan di Parlamento, trata esaki den un reunion publico. Esaki lo sosode den e simannan cu ta bin. Obviamente e ley aki tin prioridad riba tur otro ley cu tin cu trata prome cu fin di aña. E fraccion di AVP tin pura pa trata e ley aki. Rene Herde ta splica pakico: "Nos tin pura pa trata e ley aki, pa e ora no tin motibo mas pa no firma e presupuesto mes. Pasobra den e presupuesto supletorio aki tin tur e sugerencianan di e Comision di CFT di Crosou y Sint Maarten cu gobierno di Reino a exigi den e "KB". Door di cu no a firma e presupuesto pa 2014, masha hopi plan y proyecto a stanca. Tur e plannan y proyectonan aki ta na bienestar di nos pais. Gobierno ta e inversionista di mas grandi cu ta inverti directamente y indirectamente mas cu 1.2 biyon florin tur aña den nos economia y den pueblo. Ora bo para esaki, ta logico cu bo ta stanca nos economia. Ora stanca economia esun cu mas ta sufri semper ta pueblo mes. Pesey nos tin pura. Nos tin cu recupera e tempo perdi. Nos tin cu sigui cu e maneho Pro Pueblo y contra interesnan priva y weganan politico scondi di oposicion contra nos pueblo. Nos tin pura pa bolbe goberna nos pais manera pueblo a scohe pe. Nos tin pura pa e tormenta causa pa e "KB sin base legal" pasa y pa Aruba por sigui desaroya na bienestar di tur. Nos tin añanan dificil pa bay ainda. Pero e lo bay den un forma balansa y semper, semper cu e meta di cuida esnan cu entrada mas abou, e pensionadonan cu un pensioen chikito so, e trahadornan cu un salario chikito. Mientras nos ta stimula nos economia, nos lo sigui percura pa esnan den mas necesidad no cay atras mas manera a sosode bou gobernacion di MEP. " Cu e palabranan ey Rene Herde a splica e urgencia pa trata y aproba e presupuesto supletorio.  

Expresionnan haci den e articulo aki no necesariamente ta refleha opinion di ArenaPoliti.co