Marisol Lopez-Tromp ta actua na forma dictatorial y cu falta di transparencia 

ORANJESTAD – Parlamento a trata e presupuesto di Parlamento mes pa 2016, y den esaki e lider di oposicion a lansa critica fuerte den direccion di e maneho di parlamento. “Si nos kier pa pueblo respeta nos parlamento, nos mester cuminsa cu exigi respet pa parlamento, y nos mes mester cuminsa respeta e instituto di Parlamento. Mester stop cu dictadura den parlamento, y mester ta transparente. Mester simplemente sigi ley y reglamento di orden di Parlamento. Lagami ilustra cu apenas un ehempel actual, kiko mi kiermeen cu Marisol Lopez-Tromp ta aplica dictadura den Parlamento: e caso escandaloso di e proyecto di Hospital.

MEP a pidi e reunion dia 7 febr 2014, casi dos anja pasa. Pero el’a wordo yama dia 26 di februari 2015. Pa colmo el’a wordo suspendi y yama bek dia 18 di september 2015. Y riba dje, el’a bolbe wordo posponi te dia di awe.
Art. 23 di reglamento di orden di parlamento ta stipula cu e reunion aki mester a wordo yama dentro di 30 dia cu ela wordo pidi. Pero ela wordo yama 26 febr 2015 un anja mas laat. Pa colmo suspendi y según RvO e mester a wordo yama bek den 30 dia, y no den 200 dia! Y riba dje awor ta 80 dia mas leew y nada ainda di e reunion cu MEP a pidi. Presidente di parlamento ta usa e excusa cu e minister no por bin parlamento, pero ni cuanto excusa e minister duna, no ta nos asunto. Nos ta parlamento. Nos a pidi e reunion. E minister mester ahusta na parlamento, no parlamento na e minister. Aki por mira cu e presidente di parlamento ta scohe pa viola ley y regla, pa complase cu gobierno. Y ta pesey dia 27 di aug nos a perde nos autonomía. Ta pasobra e mayoria cu AVP tin den parlamento no kier a asumi su responsabilidad. Pasobra en bes di cumpli cu nan trabou di CONTROLA gobierno, nan ta fungi como stempel di un gobierno iresponsabel y corupto. Y esey ta hasi nan COMPLICE na e mal maneho di e gobierno di Mike Eman.
Si parlamento a yama e reunion aki na tempo, ta hopi problema por a evita, y ta hopi placa por a scapa pueblo. E hecho cu parlamento no a yama e reunión importante aki, ta hasi e mayoría di e parlamento aki y e presidente di parlamento complice den e corupcion na Hospital. Ora un gobierno deliberadamente ta pone pueblo paga 40 miyon EXTRA pa un proyecto, djis pa privilegia un amigo, bo no por conclui otro cu ta corrupcion! E proyecto di hospital lo costa 250 miyon florin pa trahe , pero nos yiunan y nan yiunan mester paga bek 900 miyon florin. E hospital aki NO ta brinda MAS capacidad, mes hopi cama ta keda existi. Y tampoco mas sala di operación. Pues e problema cu tin awor cu ta tarda pa un paciente wordo hospitalisa pasobra hospital ta yen, e mesun problema lo sigi existi den futuro, maske nos yiunan y nan yiunan mester paga casi 900 miyon florin.

Nos problema cu e proyecto aki ta tur e cosnan DUDOSO y CUESTIONABLE cu a tuma lugar den e bidding di e proyecto: (1) A scohe esun cu a ofrece e prijs mas halto, 40 miyon mas halto, (2) esun cu a claim pa cobra ‘meerwerk’, (3) esun cu menos experiencia, y menos capacidad a gana e bidding. Y pa por paga e EXTRA gastonan di e proyecto, mester a suta pueblo cu e health tax di 1% na december y 2% na juni, y ya luna pasa CAFT a bisa cu mester hise mas ainda!

Tur e problemanan aki por a wordo evita si presidente di parlamento a simplemente actua segun regla, y yama e reunion manera ley ta stipula”.
Cu esaki lider di MEP a duna simplemente un ehempel con e presidente di parlamento Marisol Lopez-Tromp ta desprestigia parlamento.

Expresionnan haci den e articulo aki no necesariamente ta refleha opinion di ArenaPoliti.co