Algo locual hopi hende, special esunnan rond di e gobierno Venezolano, no a spera, a sosode 6 december 2015. E mayoria di e pueblo Venezolano a scoge pa cambia e rumbo politico di nan pais. E mayoria a cansa despues di 17 aña, di nan sistema politico. E mayoria a cansa di e aumento di criminalidad y insiguridad na e pais. Pero mas importante,  e mayoria a cansa cu awendia Venezuela a bira di un pais rico y orguyoso pa uno di pobresa y miseria.

Tambe na Aruba nos ta sinti e efectonan di e situacion socioeconomico malo na Venezuela.  A pesar cu tur hende na Aruba tabata mira y sinti e efectonan di e exodo Venezolano, ainda tin algun politico tradicional aki na Aruba ta bisa cu situacion no ta asina alarmante. Pasobra nan ta uza e exodo Venezolano, pa manipula cu e cifranan di turismo y asina trata di gaña e pueblo con bon e turismo di Aruba ta bayendo.

E politiconan tradicional, ta gusta mal informa e pueblo, p’asina laga e pueblo kere cu tur cos ta bon. Nan ta gusta wanta e pueblo bobo of haci e pueblo dependiente di nan. Laga e pueblo kere, cu sin nan, no por tin un bon gobernacion. Laga e pueblo kere, cu ta nan so ta e salbacion di e pueblo. E politiconan tradicional, no kier pa e pueblo pensa of husga pa su mes. Pasobra esey por ta peligroso pa nan y e ‘sistema democratico’. Imagina’bo, un pueblo cu e madurez politico suficiente cu ta exigi calidad y bon gobernacion di e partidonan politico tradicional. Un pueblo cu ta vota consciente a base di e situacion socioeconomico y temanan di e isla, enbes di vota pasobra nan tin un vinculo personal cu un di e partidonan politico tradicional. Segun hopi hende na Aruba, esaki no por. Cu Aruba no por wordo goberna bon, si e no ta pa un di partido politico tradicional.

A pesar cu tur hende sa cu esaki ta un mentira, nan ta prefera di sigui cu mesun sistema politico tradicional. E unico logronan palpabel cu e sistema politico actual a logra pa Aruba durante e ultimo añanan ta, pa dividi e pueblo, crea mas desempleo, enrikece e clase politico tradicional mas, haci e Arubano un pedido di limosna na rudia y haci cu e isla ta bancarota, net manera cu a sosode na diferente pais den region. Pero ainda tur cos no ta perdi. Locual a pasa cu e eleccion na Venezuela, ta un desaroyo cu ta pasando e ultimo tempo na varios pais cu a wordo goberna pa partidonan tradicional pa hopi aña. Na Antias, Hulanda, Canada, Argentina, Venezuela y awor tambe na Brazil, e pueblonan a madura politicamente y nan a cansa di e mesun partidonan tradicional cu nan mesun storia y promesanan bieu. E pueblonan di e paisnan menciona, a demostra cu ora un sistema politico no ta funciona of cu e no ta sirbi e interes di e pueblo mas, e mester wordo cambia.

Na Aruba nos a purba tur sorto di sabor y combinacion politico, tur cu e mesun resultado. Aruba mester di un sistema democratico fresco, cu por trece e prosperidad y e siguridad necesario bek pa e pueblo. Si e Venezolanonan por bisa ta basta, aki na Aruba nos tambe por bisa mescos y asina enfrente e realidad di tur dia!


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co