Aña pasa, ‘Pan American Health Organization (PAHO)’ a informa con lihe e virus ‘Zika’ ta plama riba e continente Latino y den Caribe. Hasta nan a papia di un epidemia. E virus ‘Zika’, ta wordo transmiti pa e mesun sangura (Aedes) cu ta transmiti e malesanan ‘Dengue’ y Chikunguña’. Diabierna pasa e ‘Center for Disease Control and prevention (CDC)’ di Merca, a emiti un ‘Zika Virus Travel Alert’ pa turistanan cu ta biaha pa diferente paisnan den region caminda ta conoci cu nan tin e virus ‘Zika’. E paisnan aki ta: Brazil, Colombia, El Salvador, French Guyana, Guatemala, Haiti, Honduras, Martinique, Mexico, Panama, Paraguay, Suriname, Venezuela y Puerto Rico. E boletin aki a wordo retransmiti na Colombia y den prensa Hulandes (Volkskrant, 16 januari 2016). E virus aki, ta afecta e cerebro di e baby cu ainda ta den barica di su mama y pa cual no tin un cura.

Un partido politico no solamente tin e tarea pa controla gobierno, pero tambe e tin uno di informa e pueblo riba asuntonan di interes general. P’esey nos di partido ABO a scoge awe p’e tema aki. E virus aki ta plama hopi lihe y su efectonan ta desastroso pa un sociedad y su economia.

Dus e pregunta ta si e virus ‘Zika’ a yega Aruba caba?

E lo ta bon pa e autoridadnan concerni informa pueblo debido riba e tema aki, pa asina preveni dolor innecesario den famia ora e baby nace cu tur su deficiencianan y e consecuencianan cu esaki lo por tin pa e mayornan y famia. Te ainda no tin un cura pa e defectonan cu e virus aki ta causa na e cerebro di baby.

Aki pueblo ta mira con importante sanitario y higiena ta. No solamente den bo cas, pero tambe den bo bario. Si un miho esfuerso wordo haci di parti nos tur pa elimina e criadero di e sangura, nos por limita of hasta elimina e dolor personal. Tambe asina nos por preveni cu Aruba lo wordo poni riba e lista di e paisnan cu a haya un ‘Travel Warning Alert’, cu seguramente lo afecta nos turismo y crea gastonan adicional pa combati e efectonan di e virus ‘Zika’.

Corda cu insectonan tin e habilidad di reproduci y plama hopi lihe. E virus ‘Zika’ por yega Aruba solamente via personanan cu ya ta infecta of via e botonan cu ta yega cu fruta y mercancia di otro paisnan di region cu ya ta infecta cu e virus. E chens ta hopi chikito cu e virus por yega via un sangura cu a bula for di e continente pa nos isla.

Dus ban spera cu gobierno lo informa pueblo pronto riba e situacion di e virus ‘Zika’ aki na Aruba y su maneho al respecto.


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co