Despues cu e reforma fiscal (incluyendo e impuesto ABB di minimal 8%) a wordo pone temporalmente den freezer pa e minister-president, lagando asina su ‘vak-minister’ keda manera un mucha chikito, ata gobierno ta pasa pueblo un aumento di ‘wegenbelasting’ scondi net prome cu Pasco. Esaki ta pasobra e gobierno aki, mester di fondonan pa cuminsa paga bek e placa cu nan a fia pa nan CAMINDA SCUR di minimal 750 miyon florin. Un proyecto miyonario cu no tin prioridad y cu ta yega te na Pos Chikito. Dus ki beneficio Pariba di brug tin di e caminda aki, ainda ta nan so sa.

Te cu aña pasa, un doño di vehiculo tabata paga su ‘wegenbelasting’ y e tabata haya su borchi di number di auto. Desde e siman aki, e doño di vehiculo tin cu paga e impuesto pero tambe algun florin extra pa un sticker cu no ta costa ni 25 cen pa produci. Pues gobierno ta haya e impuesto regular, gobierno ta haya e placa cu e ta cobra pa un sticker barata y gobierno ta haya tambe e placa cu e no mester a paga pa traha e borchi di number di auto. Si esaki no ta un aumento di e ‘wegenbelasting’, anto Jose Feliciano no ta ciego. Pa e fiel creyente den fabula of esun cu ta prefera fiesta tur dia pa no mira e realidad amargo, corda cu e medida di pone un otro impuesto den e prijs di gasolin no ta for di mesa. El’a wordo poni solamente den freezer, pasobra e gobierno kier aparenta misericordioso cu pueblo durante e luna festivo. Y pa no gaña bo mes, e aumento scondi aki di ‘wegenbelasting’, lo no ta suficiente pa cubri e debe adicional di minimal 1.6 biyon florin cu e minister di Infrastructura a hinca e pueblo aden cu su aventura di dos CAMINDANAN SCUR. E unico motibo y esun berdadero tras di e camindanan aki, tabata e cobramento di e comision (‘fee’)cu ta varia entre 16 y 80 miyon florin. Dus pueblo, den 2016 e impuesto riba gasolin tambe lo bin, pasobra algun politico kier a parti un REGALO GORDO bou di nan grupito riba custia di pueblo.

Gobierno a uza e tactica bieu aki na varios ocasion caba. Nos por a mira e tactica aki wordo uza ora cu gobierno kier a discrimina esunnan cu ta biba pariba di brug pa cobra nan un TOL cada biaha cu nan uza e CAMINDA SCUR pa bay nan trabou. Despues cu partido ABO a mustra publicamente cu e gobierno aki ta uno discriminatorio, nan a cambi’e pa un cobramento hopi mas ‘humano’ unda cu e pueblo lo no sinti e efecto directo den nan cartera. Enbes cu e uzado tin cu paga cada biaha directo, awor e lo tin cu paga indirecto minimal 25 aña pa e ladronicia publico mas grandi den nos historia. Con bendiciona nos ta pa tin un gobierno asina ‘humano’ y creativo.

E lo ta bon pa e gobierno dinamico aki splica pueblo kico nan lo bay haci cu autonan nobo cu no tin un borchi di number di auto di 2015. Tambe e lo ta bon pa tende con gobierno kier atende cu e fenomeno di falsificacion di e sticker cu lo bin. Si malhechornan por falsifica placa, anto e lo no dura hopi tempo cu nan lo falsifica e sticker di algun cen tambe. Ban spera cu gobierno a pensa riba esaki y cu nos lo no tin cu warda te ora cu e baca a hoga, pa gobierno culpa tur hende menos e minister concerni.

Otro prueba con e ansha pa keda den poder y e enrikecimento aheno, ta sali pueblo caro atrobe. DANKI GOBIERNO PA BO ‘REGALITO’ DI PASCO Y...AINDA FALTA!

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co