Nombracion di sr. Schwengle como minister di salubridad, deporte y cuido di nos Grandinan, a habri caminda pa un deterioro total di nos salubridad.
Un desaroyo devastador cu a cuminsa cu nombracion di sr. Visser como minister den e gobernacion anterior, y cu a culmina cu un minister cu ora e habri su boca, ta pa culpa tur hende pa e desaster cu su persona y su partido a bin ta ehecuta, y consecuentemente ta beneficia esnan cu ta rondone.
Porque será?

Durante traspaso di e Landslaboratorium pa hospital, e minister aki a haña ta bon pa descualifica no solamente e laboratorio cu e tabata responsabel p’e, pero tambe tur otro laboratorio priva riba nos isla.
Ta obvio cu e minister atrobe ta papia sin pensa riba e interes di e pueblo, y sigur no di e patientnan na Aruba, pero mas pio ainda ta e hecho cu den e mesun rosea e ta duna su mes como esun responsabel pa maneho di salubridad y tambe AZV, un “brevet van onvermogen”.
Cu e declaracion tendencioso y peligroso aki, e minister a crea duda den e laboratorionan cu ta ofrece nan servicio na e pueblo di Aruba, pero loke a yama mas mi atencion ta e hecho cu - si e como minister ta haci tal expresion - con e por funciona debidamente como specialista y garantisa su patientnan un cuido optimal.
E declaracion di e minister ta atacha e credibilidad di AZV tambe, pasobra nan ta esun cu mester hiba un maneho di control. Obviamente nan no ta cumpliendo cu esaki, segun e propio minister encarga cu AZV.

Otro acto di e minister iresponsabel aki ta nombracion di un director di departamento di Salubridad.
NoticiaCla a haña informacion cu a nombra sr. Jerry Starring como director.
E persona aki ta un enfermero cu obviamente tin e confiansa total di e minister.
E ta, banda di ta forma parti di e team interino cu ta maneha e departamento di salubridad, tambe e consehero principal di e minister.
Lo ta interesante pa sa cuanto tur e “confiansa” aki ta costa nos pueblo, pasobra pornada sigur e no ta hacie.
E persona aki no tin ningun experiencia den maneho di salubridad, y esaki a wordo comproba durante e dos añanan cu e minister tin e encargo di salubridad, pasobra nunca antes salubridad a wordo maneha cu tanto estupides y menosprecio pa e patient.
Na Spaño tin un dicho famoso: dime con quién andas, y te diré quién eres.

Den un otro articulo nos lo bay mas den detayes di e nombracion aki.

Aruba mester cuminsa mara faha, y prepara pa un deterioro aun mas extenso di loke caba ta existi riba nos Isla.
E presupuesto di 2016 ta indica cu menos placa lo wordo inverti den salubridad, mientras malesanan cronico lo aumenta, y lo tin mas hendenan riba 65 aña.
Esaki, combina cu criticanan formal y devastador di Raad van Advies riba e maneho incoherente di e Minister di Salud, ta haci nos realisa cu AINDA FALTA un deterioro di cuido pa nos pueblo.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, januari 19, 2016

Expresionnan haci den e articulo aki no necesariamente ta refleha opinion di ArenaPoliti.co