Prome Minister Mike Eman satisfecho cu esaki y otro beneficionnan social

ORANJESTAD- Aña 2016 ta habri den forma positivo riba hopi tereno. Hopi bon noticia na horizonte. Un di nan sin duda ta aumento di salario minimo cu 2,5%. Un reto grandi cu a conoce su contratiempo, pero cu ta wordo implementa dia 1 di februari proximo. Prome Minister Eman ta masha satisfecho cu e ultimo desaroyo aki. Hunto cu Minister di Labor Paul Croes a traha duro pa logra e aumento di salario minimo, apesar di instancianan cu no ta di acuerdo cu e aumento aki.

Na luna di juni caba Prome Minister Eman a pidi conseho na SER pa aumento di salario minimo. Eman ta haya e paso aki necesario pa asina por salvaguardia e poder di compra di e ciudadano. “E forma di pensa aki ta uno ancra den e fundamento y principionan di nos gobierno. Principionnan cu ta nos guia ora di haci escogencianan”. Eman a bisa cu e liña di pensamento di gobierno ta keda cu mester cumpli cu e normanan acorda, pero semper a base di escogencianan cu gobierno haci y considerando e interes general di pais Aruba. Ta den espirito di e pensamento aki cu Prome Minister Eman a reuni cu SER, despues cu Minister Paul Croes tambe a manda un carta den cual e ta pidi pa traha mas lihe posibel riba un aumento di salario minimo.

Introduciendo un aumento di salario minimo di 2,5% entrante 1 di februari 2016 ta complementa cualkier efecto cu BAZV por tin pa esnan cu tin un entrada di 2500 florin of menos.” Eman ta masha satisfecho cu loke su gobierno ta logrando. E reparatietoeslag pa muchanan di scol y pensionadonan, schoolkinderentoeslag, aumento di bijstand, indexering pa empleadonan publico, voorjaars- y najaarspremie. Esfuersonan grandi cu gobierno ta haciendo pa stimula e poder di compra di e ciudadano. “E situacion cu nos a haya na 2009 a pone nos haci escogencianan rigoroso. Nos a scoge pa inverti pa asina stimula e economia. Ciere di e refineria a rekeri reformanan, pero semper haci di tal forma cu tanto social como economicamente por a garantisa cu e poder di compra di esnan mas vulnerabel den comunidad a keda fuerte. Ta obligacion di gobierno y di ningun otro instancia of instituto pa tuma decisionnan pa yuda esnan di menos recurso pa nan na nan turno por cumpli cu nan obligacionnan manera pago di huur, transporte, cuminda y tur loke ta necesario pa por biba un bida trankil. Esey nos ta haciendo cu aumento di salario minimo”, Eman a bisa.

Expresionnan haci den e articulo aki no necesariamente ta refleha opinion di ArenaPoliti.co