FRIENDS, FAMILY AND .....? 

STA CRUZ -- Tur hende por corda con Mike Eman y AVP a demonisa huurmento di edificio tempo di gobierno di MEP. Hasta Mike Eman a sembra odio contra famianan di ministernan di MEP, pasobra segun Mike Eman, tabata ladronicia. Con a demonisa ruman, tanchi, omo, di ministernan di MEP. Mike Eman a priminti den campanja 2009 cu e ta bai stop tur huur di famianan di MEP, y elimina e BBO.
Awor ta bin sali na cla cu, apesar cu Mike Eman a para tur huur di famianan di minister di MEP, Mike Eman y su gobierno a huur MAS hopi cu gobierno di MEP. Kiermeen a demonisa henter un comunidad, y a bin hasi PEOR.

Gastonan di huur pa 2016 segun e presupuesto ta 24 miyon florin, casi 3 miyon MAS cu ultimo anja di gobierno di MEP. 13% MAS cu locual e mes a demonisa. Esaki ta otro prueba cu Mike Eman ta un manipulado grandi. Manera por mira riba e grafico, ni un solo anja Mike Eman a baha e gastonan di huur. Es mas, na principio a mentene nan mesun cos, pero despues nos a mira aumentonan drastico, y pa anja 2016 tin 24 miyon florin riba presupuesto pa paga na gastonan di huur, compara cu 21 miyon florin na ultimo momento durante gobernacion di MEP. Cierto momento, na 2014, hasta  e gastonan di huur di Mike Eman a bira 28 miyon florin!

Pregunta ta: cu ken ta huur asina tanto miyon MAS? Cu friends, family and ....? Unda a keda e promesa di baha gasto di huur? Y elimina BBO? Ambos tabata mentira di Mike Eman! Hecho ta cu e amigonan y famianan di Mike Eman y Otmar Oduber ta gosando grandemente di huurmento y otro gastonan di gobierno. Ta un berguensa cu e gobierno aki ta sigi malgasta placa, sin importa ken mester paga e cuenta mayan.

Expresionnan haci den e articulo aki no necesariamente ta refleha opinion di ArenaPoliti.co