Chris Romero (MEP): Fast Ferry lo representa un desaroyo positivo pa San Nicolas
Den e ultimo dianan aki nos a haya tende cu tin un posibilidad grandi cu lo bin cu un Fast Ferry na Aruba. E proyecto aki ta data for cuminsamento di añanan 90, pero diferente aspecto a stroba pa e bira un realidad.
Banda di e reapertura di e refineria, e Fast Ferry mester bira e otro gran noticia di desaroyo positivo pa San Nicolas.
E Fast Ferry lo conecta Aruba, Boneiro y Corsou via laman, y na un prijs mas economico compara cu transporte aereo, cual tambe lo contribui na crecemento turistico pa nos isla.
Segun estudionan di logistica a duna di conoce, e locacion ideal pa e waf di e Fast Ferry lo ta na San Nicolas.
Construccion di un waf pa e Fast Ferry na San Nicolas lo stimula e crecemento economico pariba di brug.
Logicamente e proyecto di Fast Ferry lo crea cuponan nobo di trabou, directa y indirectamente. pero tambe e lo incentiva inversionistanan local y internacional pa inverti den San Nicolas.
E proyecto pa opera e Fast Ferry na San Nicolas lo traduci den mas trafico di otro partinan di nos isla pa pariba di brug, cual lo duna un empuhe extra na e economia di San Nicolas.
Cu e construccion di un waf na San Nicolas pa e Fast Ferry, lo trese cun'e cu e infrastructura pariba di brug lo haya un "facelift", cual finalmente lo duna resultadonan hopi positivo pa nos pueblo di San Nicolas.
Nos di partido MEP ta apoya e proyecto di e Fast Ferry totalmente. Logicamente tin preguntanan den laira cu ainda mester haya contesta, pero mirando cu realisacion di e proyecto aki ta den combersacion ainda, lo ta hopi prematuro pa haya contesta inmediato riba nan.
Expresionnan haci den e articulo aki no necesariamente ta refleha opinion di ArenaPoliti.co