GASTO DI BIAHAMENTO TA AUMENTA CU 25% DEN 2016 

STA CRUZ -- Fraccion di MEP ya algun siman ta studiando e presupuesto 2016, y a publica varios analisis di e presupuesto.
"Un di e gastonan cu a subi drasticamente ta gasto di biahamento, cu ta subi cu 25% den 2016. Pa e ministerio di Mike Eman tin casi 700 mil florin pa e biaha den 2016, cu ta 160 mil mas cu anja pasa. Mi ta puntra mi mes ta unda mas Mike Eman kier bai biaha. Anja pasa el'a biaha mundo rond caba. Unda mas e mester bai bishita prome cu e caba di zink e pida baranca aki?

E gastonan total pa tur ministerio ta 1.778.000 FLORIN, pues 1.8 miyon florin. Esaki ta un abuso den tempo di crisis, cu no tin placa pa pa cuido di nos muchanan special, no tin placa pa cuido di nos grandinan, pero si tin placa pa ministernan biaha mundo rond!

Awor tur hende por wak ta pakiko e gobierno di Mike Eman tin cu cobra belasting atrasa pa loco, y nan ta bin cu medida na cantidad, BBO, BAZV, cobramento pa piki sushi, schoolgeld, parkeermeter. Tur pa nan tin MAS placa pa nan por sigi biaha y fiesta.

SOLUCION DI MEP
Mi ta keda enfatisa cu e problema financiero ta simple pa soluciona. Unico cos cu bo tin mester ta un bon vision, combina cu determinacion y curashi. Y den e vision di MEP, e pueblo mester ta prome, e ser humano mester ta central, y no tin espacio pa tanto gasto di luho! E gastonan di biahamento, fiestamento, huurmento, abogado mester baha. E cantidad di coordinador mester baha. Y mester bai bek na 7 minister, of hasta menos, y asina bo ta scapa na forma masha facil 50 miyon florin SIN cu e ta afecta nos pueblo. Pesey mi ta ripiti: e solucion pa e problema financiero no ta dificil, pero bo mester tin un vision, determinacion y curashi pa para e tipo di abusonan aki. Ami y partido Movimiento Electoral di Pueblo tin e vision, determinacion y curashi pa hasi esey", tabata palabranan di Lider di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co