Nos pais actualmente ta pasando no solamente den un crisis gubernamental y un crisis financiero sino tambe un crisis economico. Nos tin un gobierno cu a derocha placa di fiesta cu placa di pueblo y awe e resultado ta un debe di nada mas y nada menos di 4 biyon florin.

Awor aki nan na Aruba tin un pobreza domestico creciente y hasta por bisa un pobreza den extremo. E costo di bida cu tin na Aruba actual no ta den balans cu e entradanan y e costo di bida ta completamente for di proporcion y a surpasa e nivel di entrada. Esaki ta pone cu gran parti di nos pueblo ta bibando den circulo di debe. E placa cu un trahador ta gana awe simplemente no ta yega pa cubri su gastonan di hypotheek di cas, prestamo pa auto, awa, coriente y comestibles. E gobierno aki a crea un deterorio social nunca antes bisto. E situacion ta asina alarmente cu Rode Kruis ta bisa cu a e problema socialnan na Aruba a sali for di man. Si antes Rode Kruis tawata bai den pueblo 2 biaha pa anja pa yuda esnan den mas necesidad cu cuminda awe nan mester bai 4 biaha. Tin hende ta bisabo cu nan tin hamber y cu nan no a come ainda. Esaki ta e situacion cu nos ta bibando aden.

Miles di mucha ta bai scol sin come. Tin un total di 12,000 famia cu no por paga nan tarifa di awa, un total di 8000 famia cu no por paga nan cuenta di coriente y ainda e gobierno di Mike Eman kier pretende cu e situacion na Aruba ta bon. Diaramente mi ta haya mensahenan via facebook di cantidad di hende cu no tin placa, yamadanan cu hendenan den probleman financiero, hendenan cu no tin perspectiva. Esaki ta e situacion lamentable cu Mike Eman a crea. Un sitacion di decadencia social, deterorio den calidad di bida y e maneho irresponsabel a riuna nos pais.

No solamente e costo di bida ta strangulando nos economia pero e costo pa haci negoshi na Aruba ta sumamente halto. Un comerciante mester paga loonbelasting, prima AZV, prima AOV, e primanan social, mester paga BBO, winstbelasting anto pa completa e asunto mester paga 15% mas na gastonan di electricidad. Consequentemente e comerciante ta aumenta prijsnan di tur su productonan y na final ta e consumidor cu ta pueblo ta paga pa tur esakinan.

Tur indicador economico di nos pais ta dunando indicacion cu nos ta den crisis economico. E siuacion ta uno hopi grave y serio.

E crisis na Aruba ta bisto y tur famia ta sintiendo e consequencia di e maneho cu a wordo hiba e ultimo 6 anja y mey nan. E gobernacion di Mike Eman no tin un rumbo, no tin coherencia y no tin communicacion. Actualmente e crisis den gobierno ta asina grandi cu gobierno mes no sa mas kiko nan ta haciendo cu e pais. Hecho ta cu cada dia e gobierno aki keda mas atras e pueblo ta keda bai. No tin un perspectiva pa un mihor mayan pasobra e hendenan aki a demostra incapaz pa percura pa e hende progresa. Ki bal bo ta traha un green corridor anto e hende no tin laca pa sobrevivi. Ki bal bo ta cumpra 4 tram y muchanan ta bai scol sin come. Esaki ta e tristo y amargo realidad di nos pais na anja 2016!

Expresionnan haci den e articulo aki no necesariamente ta refleha opinion di ArenaPoliti.co