Den un entrevista teni cu e hoben Gerick Croes e la expresa su mes over di Betico (efm). E hoben a expresa lo siguiente: "Ora bo tende e nomber di Betico e ta ponebo pensa di biaha na un luchador incansabel. Un persona cu a desafia e pensamento di "no por" demostrando cu aunke nos pais ta chikito nos por logra tur loke nos pone nos dilanti cu hopi trabou y determinacion. E caminda pa logra e Status Aparte no tabata uno facil y Betico a enfrenta diferente obstaculo y reto. Pero e hecho cu Betico a considera su mes no solamente tata di un famia, pero tata di un pueblo, tabata e motivacion necesario pa logra lo mihor pa Aruba.

Riba e pregunta con Betico Croes a impacta su bida, Gerick Croes a contesta lo siguiente: " mi tin 30 aña y ta mesun bieuw cu nos Status Aparte. Mi no a haya e oportunidad di conoce Betico pero tur loke mi a wordo siña di e lucha y sacrificio ta ponemi pensa riba un lider historico. E lucha pa Status Aparte ta uno cual como hoben por inspirabo pa logra bo metanan personal pero tambe metanan pa bienestar general. Hopi biaha ta pasa den nos cabes como hoben pa logra establece un mihor futuro pa Aruba y e siguiente generacionan wel e lucha di Betico por sirbi como "gasoline" pa nos hasi nos esfuersonan pa logra cosnan cu aunke ta sona dificil por wordo logra cu trabou duro.

Si mas hoben haya sa mas di e historia di Betico Croes como estadista y un gran lider y tata pa e comunidad aki e aprecio cu ta biba entre nos hubentud lo a crece hopi mas na locual nos tin awe. E lucha pa bienestar di nos pueblo no a termina si, laga nos cu mas energia aun traha y lucha pa hiba nos pais dilanti. Mi ta desea pueblo di Aruba felis dia di Betico! , tawata palabranan di e hoben sr. Gerick Croes.

Expresionnan haci den e articulo aki no necesariamente ta refleha opinion di ArenaPoliti.co