Y TA SIGI BUSCA PLEITO AWOR CU LABORATORIONAN 

ORANJESTAD -- Lider di MEP a tuma nota di expresion di Minister Schwengle cu a duna di conose cu e como minister encarga cu salubridad tin duda riba e calidad di laboratorionan na Aruba, y hasta a cuestiona e certificacion di Laboratorio Familiar.
“Na prome lugar mi ta puntra mi mes con e minister ta drumi anochi. E ta dos anja caba minister, anto e sa esaki, pero no ta hasi nada. Esaki ta un falta di respet imenso pa pueblo di Aruba. Imaginabo cu den bo famia tin indice di cancer, y dokter ta mandabo bai controla y bo ta controla tur anja. Bo mag di confia riba resultadonan di laboratorio, y si no ta asina, anto e minister no por djis keda keto y tira algo den laira. Cancer no mester toca na bo famia pa bo tuma salubridad na serio, tum’e na serio awor caba.
Na di dos lugar mi ta pensa cu e minister mester ta hopi inhumano, sin gevoel hasta sin berguensa cu e sa tur esaki, pero ta keda keto y ta drumi trankil sabiendo cu salubridad publico no ta den bon man.
Locual e minister a hasi ta di condena, y mi ta urgi e minister pa tuma accion mesora, y no bolbe bai drumi trankil.

Ami, mescos cu tur hende, por a mira con entre otro Laboratorio Familiar a busca su acreditacion, pasobra nan a transmit esaki via television pa un temporada hopi largo. Y ningun dia e minister a bisa nada. Awor cu e ta mira un Arubiano ta lucha pa hiba su lugar padilanti, e ta busca pleito cun’e y purba desacredit’e.

Ya caba pueblo di Aruba mester sufri cu negligencia medico, cu pacient cu ta muri den porta di hospital. Mi no ta scuche e minister ta bisa nada al respect, y tampoco e ta atende cu e asunto pa duna mas confiansa den e sistema medico di Aruba. Al contrario, awor e ta trese mas inqietud. Pesey e minister mester tuma accion awor y regla e asunto aki awor.

MINISTER MESTER BAI
Si e minister no tuma accion, y no regla e cos aki den un siman di tempo, e mester bai pa otro hasie. Pasobra un minister cu ta drumi trankil dos anja caba, sabiendo di e posibel problemanan den laboratorio, no merece di keda como minister.
Mi ta urgi minister Schwengle pa e actua liher, mes liher cu el’a bai tira lodo e mester regla e asunto aki. Nos pueblo merece un bon cuido di salud especialmente pa tur e placa cu nos ta pagando den AZV, y si minister Schwengle no por brinda esaki, hala un banda pa otro cu si por, hasi’e. Mi no por kere cu den henter partido AVP no tin ningun hende cu si tin e curashi pa mehora nos calidad di cuido. Pero si den seno di AVP no tin ningun hende capas pa atende cu salubridad public, busca un vakminister, mescos cu a hasi cu finansas publico” ta palabranan di lider di MEP Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co