MINISTERNAN MESTER CONTESTA PREGUNTA DI PARLAMENTARIONAN 

ORANJESTAD -- Minister Arthur Dowers, den un muestra di arogancia total, a comete e peor eror cu un gobernante por hasi: viola articulo III.17 di nos Constitucion. E texto di e articulo ta:

Artikel III.17 Elk lid van de Staten heeft het recht vragen te stellen aan de ministers en de staatssecretaris. De ministers en de staatssecretaris beantwoorden deze vragen binnen redelijke termijn, voor zover het beantwoorden daarvan niet strijdig geoordeeld kan worden met het belang van het Land of van het Koninkrijk.

Fraccion di MEP a hasi Minister Dowers 71 pregunta por escrito durante tratamento di presupuesto, manera ta custumber. E minister a contesta 25 pregunta, y e demas 46 e minister a contesta cu lo contesta nan durante e reunion publico.
Pero durante e reunion publico e minister a nenga di contesta nan, argumentando prome cu e fraccion no tin interes pa scucha contesta. Lider di MEP a splica e minister cu si e personalmente no tin confiansa mas den e minister, no kiermeen cu e minister por keda sin contesta preguntanan tocante e ministerio.
Despues e minister a argumenta cu ya el'a contesta nan caba den pasado. Pero con e por a contesta nan si varios di nan tin di haber cu e presupuesto 2016?
Ta obvio cu minister Dowers no ta interesa den cumpli cu su deber constitucional, y bou e circumstancianan asina, e no por keda mas como minister.
Pa e motibo ey Fraccion di MEP a entrega un mocion di desconfiansa contra e minister. Esaki ta e di 5 mocion di desconfiansa contra Arthur Dowers.

SINBERGUENSA
E minister tabata tin un actitud hopi bergonsoso den parlamento, pasobra aparte di mustra su arogancia y no contesta pregunta, e tabata stroba parlamentarionan di MEP pa hiba palabra, y hasta a yama Glenbert Croes (MEP) pa SINBERGUENSA! Algo cu a cai den masha mal tera. E nivel di e ministernan a laga hopi di desea, pero especialmente esun di Arthur Dowers.

Expresionnan haci den e articulo aki no necesariamente ta refleha opinion di ArenaPoliti.co