Minister Otmar Oduber a bishita prome Mercado di Santa Rosa cu bon noticia 

ORANJESTAD (AAN) Diadomingo un biaha mas Santa Rosa tabatin nan tremendo mercado di purga. Un cantidad di 30 tent cu a keda poni den disposicion cu e tremendo produccion 100 porciento local. Minister di Turismo,Transporte, Sector Primario y Cultura Otmar Oduber tabata presente y ta indica un biaha mas e importancia di cultiva riba nos propio tera. E conscientisacion pa nos mes keda trece nos identidad dilanti unda cu ta expone nos mesun cumindanan original di Aruba. Sinembargo Minister Oduber ta consciente cu pa comunidad por produci mas di loke ya caba ta haci no ta barata y ta pesey mes a tuma un decision den Minister Raad cu ta positivo pa nos cunukeronan na Aruba. Segun Minister Oduber Gobierno di Aruba den su programa di gobernacion a pone como meta cu lo haci sector primario un sector cu ta liber di impuesto y cu hopi orguyo recientemente den Conseho di Minister hunto cu Minister di Finansas Angel Bermudez a palabra cu pa prome di mei 2016  lo tin un decreto cu ta wordo saca anticipando e ley unda cu tur hende cu ta practica agricultura , cria y pesca sea ta pa hobby of  comercial lo por bin na remarca. Hopi hende no ta na altura cu ya caba tin un bon beneficio den e ley pa e piscadonan y na unda cu masha poco hende ta haci uzo di e permiso. Awor pa esnan cu ta haci agricultura y cria e permiso aki tambe lo conta mescos cu e piscadonan. Lo mester aplica na Santa Rosa pa e permiso y na momento cu a ricibi e permiso, hunto cu e adaptacion cu ta bin den ley y e begunstigende beschikking cu lo keda anuncia dia prome di mei proximo oficialmente,esnan cu ta planta y cultiva lo por sintinan un poco mas alivia riba nan costo. Asina tambe e productonan, materialnan y inkomstenbelasting lo keda poni riba sero. Minister Oduber ta kere cu asina lo por fomenta mas productonan cu ta keda produci, traha y cultiva aki na Aruba. Esaki ta un manera di biba mas saludabel tambe mirando cu e ta keda planta aki na Aruba mes, pero tambe e prijsnan mester ta mas barata cu esnan cu ta bin for di exterior. Tambe actualmente tin varios combersacionnan andando cu WEB NV y Minister Oduber ta spera cu dentro e simannan nos dilanti lo por haci un anuncio positivo tambe. Ta conoci cu Aruba masha tiki den aña por bisa cu awa ta yobe, pesey mes lo trata di yega na un acuerdo cu WEB NV mas pronto cu ta posibel banda di e decision liber di impuesto. Despues cu e proceso aki ta cana lo keda monitoria kico ta e cambio y energia di nos localnan pa cultiva mas y cu probablemente lo por yega un dia cu si Aruba mes por sostene su mes den e parti aki , Minister Oduber lo por sigui duna su apoyo cu un dia lo por hasta baha importacion di algun producto cu Aruba mes lo por genera pa e pais. E intencion tras di e ley aki ta pa incentiva esnan cu ta haci e trabao aki na un manera comercial y  pa nan haci e na un escala grandi tambe. Ta hopi importante pa nos mes por planta nos mes un concomber, tomati, promenton, mushroom ect. Actualmente Santa Rosa su tarea ta di inventarisa hunto cu departamento economico pa asina hunto por yega na miho manehonan riba e productonan cu por keda limita, pa crea espacio pa nos localnan produci cu un miho oportunidad pa un futuro den agricultura y cu potencial economico positivo pa nos hendenan.

Expresionnan haci den e articulo aki no necesariamente ta refleha opinion di ArenaPoliti.co