A cera conoci cu metodonan aplicabel pa atende cu escasez di awa y tereno pa cultivo Mas of menos un aña y mey pasa Minister President Eman a firma un MOU cu UDC, University of the District of Columbia, unda ya caba varios proyectonan a tuma luga. Den fin di aña pasa, un delegacion di Aruba encabesa pa directora di Santa Rosa, Sra. Nathalie Maduro, tabata na Washington D.C. pa atende cu un serie di sesionnan informativo na UDC cu lo por apoya e vision di Gobierno pa Sector Primario. Un sector cu lo bira liber di impuesto, pa di e forma aki lo kier sigui incentiva y motiva produccion local riba nos isla, produccion di cuminda saludabel pa nos hendenan y naturalmente un empuhe grandi pa nos agricultornan , criadonan di bestia y piscadonan pa sigui cu nan ofishi cu nan ta haci. Minister Oduber durante su bishita di trabou na Washington D.C. a traha luga den su agenda yen pa pasa reuni cu entre otro e director di UDC, Ronald Manson Jr., Dr. Sabine O'Hara decano di sector di Agricultura, Sostenibilidad Urbano y Ciencia Ambiental y Profesor Ralph Belton presidente di Departamento di Arkitectura y Planificacion Urbano. Minister Otmar Oduber a ricibi un splicacion amplio y a cera conoci un poco mas cu e metodonan cu ta wordo aplica pa atende cu escasez di awa y tereno pa cultivo, specialmente pa por produci alimentacion pa uzo propio.

E mandatario di Aruba ta indica cu a cumbini riba intercambionan di trabou cu lo por continua den futuro, mirando cu proximamente Minister President tambe lo ta na Washington D.C. cu e intencion pa extende e MOU y te hasta explora e posibilidad pa cera un asina yama "sister act" entre Washingthon D.C. y Aruba. Sr. Oduber ta splica cu University of the District of Columbia, a demostra e atencion special brinda na e aspecto di agricultura y e plannan cu Gobierno di Aruba tin pa haci di e sector aki uno cu lo ta liber di impuesto, e sector aki por bira te hasta atractivo pa nos studiantenan, unda cu awor tin tur e diferente tecnicanan y un gran cantidad di investigacionnan tumando luga na UDC.  Den cuadro di esaki a reuni specificamente cu e director di UDC Sr. Ronald Manson Jr. riba e posibilidadnan cu den e proximo simannan nos dilanti lo por spera un delegacion di e universidad pa bin Aruba y hunto cu departamento di L.V..V. Santa Rosa haci un investigacion riba tur e posibilidadnan cu Aruba tin a base di nos recursonan limita di entre otro tereno, pero cu tecnologianan nobo cu tin cu lo por uza por ehempel di aquaponics of hydroponics of otro sistemanan cu lo por tin. Sr. Oduber ta splica cu durante su bishita na UDC a mira con e mesun universidad cu su edificionan existente a comberti henter e area di e dak un dak sostenibel. Ta trata aki di un edificio existente cu no a wordo prepara manera awor ta tuma luga pero den un forma hopi creativo a haci uzo di diferente  tecnica y tecnologia bon hinca den otro, a crea un espacio cu por planta y cultiva. Minister Oduber a ricibi tambe un amplio splicacion di con e universidad ta recicla te hasta nan awa cu lo por ta bentahoso pa Aruba mirando nos limitacion y escasez di awa. Pa Minister e ta interesante pa mira con nos lo por aplica esaki na Aruba mirando e cantidad di edificionan cu nos tin. Cu e tecnologianan aki lo por te hasta crea un sistema di sostenibilidad pa e propio edificio cu na su turno lo disfruta di menos uzo di energia pa combati calor, ya cu e mesun dak yena di cultivo lo preveni tanto calor penetra e edificio. Tur esaki lo por keda determina asina cu e investigacion di e delegacion di UDC bishita nos isla. Minister Oduber a probecha e encuentro mirando e continuacion di e relacion cu tin, pa nos propio yiunan di tera haya e oportunidad pa sigui nan estudio na UDC cu tarifanan special, cu den futuro ta percura pa expertonan y profesionalnan den e Sector di Agricultura. Minister Oduber ta sumamente satisfecho cu e encuentro na University of the District of Columbia  y ta cla pa sigui traha di cerca cu e universidad na bienestar di nos Sector Primario.

Expresionnan haci den e articulo aki no necesariamente ta refleha opinion di ArenaPoliti.co