DEN HAAG - Lider di MEP Evelyn Wever-Croes ta actualmente na Den Haag Hulanda pa varios reunion.
"Un tema cu ta bin dilanti den tur reunion ta e tema di INTEGRIDAD. E problemanan na Aruba entorno integridad di e ministernan tin interes di Politiek Den Haag. Desde e caso di seguro di studiante di minister Hooijboer-Winklaar, e caso di fiesta di permiso di minister Paul Croes, e negoshi cu tereno di minister Sievinger den cual hasta un parlamentario di AVP ta involucra, e caso di strawberry-gate di minister Otmar Oduber y awor e dealnan cuestionabel di e Logo di Aruba. Tur ta casonan cu ta pone cara di henter nos pais na berguensa. Y cuidow Hulanda usa esaki como motibo pa otro "aanwijzing".

WODC
Un otro cos ta wordo contempla ta pa bolbe laga hasi un investigacion di WODC. Ya ta 6 anja pasa cu WODC a hasi investigacion riba gobierno di MEP y na final a yega na conclusion cu - cu excepcion di e maneho di infrastructura - no tin sospecho di actonan fraudulento ni castigable. Apesar cu ta Mike Eman mes a busca e investigacion di WODC e tempo ey, awor e mes ta neglisha tur e recomendacionnan di WODC y ta actuando contra tur regla di integridad.
Na Aruba tur hende ta cansa y fada di tantisimo nepotismo, favoresimento di amigo y famia y di sponsor di campanja. Ta bira tempo pa accion. Ohala nos tuma paso nos mes na Aruba pa pone nos cas na ordo y asina evita cu Hulanda mester tuma paso pa pone cosnan na ordo pa nos" segun lider di MEP Evelyn Wever-Croes.

ANDRE BOSMAN
Lider di MEP a reuni cu parlamentario di Tweede Kamer Andre Bosman riba diferente tema. "Mirando cu parlamentario Bosman ta hopi critico riba algun aspecto di gobernacion na Aruba, ta hopi importante pa e ta na altura di tur locual ta socediendo na Aruba. Nos tabata tin un bon reunion y lo mi duna mas detayes di nos reunion una ves mi ta na Aruba. Mi ta satisfecho di e resultadonan di mi biahe y ta agradesido pa tur esnan cu a yudami den esaki" segun Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co