Como ex parlamentario mi ta dirigi mi mes na bosonan cu lo mester vota pro of contra e amienda cu lo habri caminda pa legalizacion di matrimonio homosexual. Y como ex sacerdote mi mensahe ta cu siendo catolico bo por vota na favor di matrimonio homosexual. Mons. Secco y Rev. Szpila tur dos no ta obedeciendo Papa Francisco, pero ami lo ta e prome pa defende Mons. Secco y Rev. Szpila cu ta nan derecho pa tin un opinion diferente cu Papa Francisco. Semper tabata asina, no tur catolico mester pensa mescos. Catolico ke men universal, esei ke men unidad den diversidad.

Papa Francisco a duna instruccion cu tur sacerdote cu a abusa di menornan di edad mester wordo redusi na e estado laical y cu un obispo cu sigui duna encargo pastoral na un sacerdote asina lo mester renuncia. Mons. Secco no a obedece Papa Francisco, tin sacerdotenan cu a yega di comete pedofilia den diocesis di Willemstad cu ta sigui funciona como sacerdote y Mons. Secco tampoco a renuncia. Papa Francisco a indica, riba conseho di e renombrado teologo cardenal Walter Kasper, cu catoliconan divorcia lo por risibi santa comunion. Toch na misa di Dakota ta sigui reza e oracion cu ta expresa cu esnan divorcia no por risibi santa comunion, ke men Rev. Szpila tampoco ta obedece Papa Francisco.

For di inicio di nos Iglesia tabata conose e diversidad di opinion. Pedro tabata pensa cu un cristian mester sigui e costumbernan hudiw, mientras cu Pablo tabata pensa net contrario, cu bo por ta cristian sin sigui e costumbernan hudiw. Esei tabata e prome 'clash', cu a keda discuti na loke ta wordo considera e prome concilio di Herusalen, unda a disidi cu Pablo por sigui cu su practica y no a pidi Pedro pa renuncia na su practica. Precisamente e luna aki nos ta celebra e fiesta di San Pedro y San Pablo, tur dos a wordo declara santo a pesar cu nan tabata pensa completamente contrario riba loke ta ser cristian. Un no tabata menos catolico cu e otro.

Pesei boso parlamentarionan  por vota na favor di matrimonio homosexual siendo catolico, a pesar cu Mons. Secco a saca un comunicado bisando cu e ta contra matrimonio homosexual. Mons. Secco ta haci referencia na e Catecismo catolico, pero mi por sigura boso cu mayoria di nos teologonan no ta di acuerdo cu e comision di algun teologo cu a prepara e catecismo aki. Boso mes por lesa den e revista internacional di teologia Concilium, cu ta aglutina e miho teologonan di mundo, e critica funda cu tin contra e catecismo aki. E principal ta cu cristianismo no ta un doctrina sino un practica.

Y como sociologo mi por sigura boso cu matrimonio no ta mescos cu famia. E matrimonio civil actual ta un institucion moderno cu a surgi cu e idea di propiedad priva. E matrimonio catolico den su forma actual tambe ta mas 'reciente', for di Concilio di Trento di siglo 16. For di e standardnan aki moderno, Pedro y otro apostelnan no tabata casa, Hose y Maria no tabata casa, sino mas bien for di criteria actual tabata compaña, pero ningun hende lo tribi di jama nan immoral. Al contrario nos ta honra nan como e sagrado famia. Nan tabata casa segun e costumbernan hudiw.  Den diferente epoca e costumbernan aki tabata permiti poligamia, es decir cu un famia tabata consisti di e esposo cu su diferente esposanan y yuinan. Pesei den Bijbel poligamia tabata normal. Awendia poligamia ta castigabel pa ley penal.

Ke men e forma di famia ta cambia den historia. Awendia a surgi otro forma di famia, di dos mama of dos tata cu nan yuinan sea propio of adopta y e famia aki ta pidi boso legalizacion. Por ultimo, Papa Francisco no solamente a pidi pordon pa tur e ofensanan di Iglesia contra e homosexualnan, sino tambe a pidi pordon na e famoso teologo Leonardo Boff, kende a wordo castiga pa Juan Pablo II, y a pidi su colaboracion den e enciclica Laudato Si. Y Leonardo Boff ta un defensor di e matrimonio homosexual. Pesei boso por vota na favor di legalizacion di matrimonio homosexual sin renuncia na e fe catolico.

Expresionnan haci den e articulo aki no necesariamente ta refleha opinion di ArenaPoliti.co