Finansa publico: 

Den combersacion cu Rene Herde' riba e aña di parlamento nobo y estado di nos pais awor aki y kico ta bay haci awor, ela contesta entre otro esaki: "Si bo realisa unda nos tabata despues di 8 aña di  gobiernonan di MEP na 2009 y compar'e cu unda nos ta awe, bo ta wak e diferencia den gobernacion bon cla. Riba tur tema di importancia pa nos pais y nos hendenan, nos pais tabata bayende hopi malo. Di e decadencia den infrastructura, edificionan di gobierno kibra, pero yen di edificio ta huur di famia, scolnan den mal estado y cu mester a warda decadanan pa haya atencion, e fondonan di pensioen tabata na caminda pa bay bancarota y e pensioen di mas cu 20 mil hende tabata na peliger. E refineria tabata sera y turismo tabata bayendo malo. Prijs di coriente a subi cu 250 %. Desempleo a subi te yega 12%. Entrada di gobierno a cay. Pa haya mas placa MEP no a corta gasto pero a impone e BBO riba pueblo. Pero nunca pueblo a haya algo bek pa esaki." E lider di fraccion di AVP a sigui splica unda nos ta awe riba e mes un temanan aki shete aña despues. "Si bo compara unda nos ta awe riba e mes un puntonan aki bo ta wak e cambio grandi. Nos infrastructura ta mehorando enormemente. Plannan cu tabata tin pa 30 aña a wordo ehecuta. Nan a crea empleo pa hopi hende. Nos ta bay tin un hospital nobo despues di  mas cu 40 aña. Awe desempleo a baha te na 7% mas o menos. Cu reapertura di e refineria e desempleo ta bay baha ainda mas. Nos economia cu a cay cu 15% bou di maneho di MEP, a crece y awe ta rond di 2%. Turismo ta sigui crece den calidad. Hunto cu e refineria, turismo lo fortifica nos economia mas cu nunca prome. E fondonan di pensioen ta stabiel atrobe cu un cobertura di 100%. E pensioen di tur pensionado ta sigur atrobe. E 50 mil trahadornan den sector priva nunca tabata tin un pensioen di nan mes. Awor nan ta inverti hunto cu nan doño di trabou den un pensioen di nan mes! Scolnan cu a keda masha hopi aña sin mantencion, awe ta lugarnan bunita y agradabel pa traha y studia atrobe. Prijs di awa y coriente a baha y ora sigui cu e plannan di genera energia renovabel, e prijs lo keda stabiel of kisas hasta baha. Esey ta e situacion awe"! Manera semper, Rene Herde' no a lagu'e akinan. Ela evalua e 7 añanan di gobernacion di AVP segun e mes un temanan tambe.

Expresionnan haci den e articulo aki no necesariamente ta refleha opinion di ArenaPoliti.co