Awor ta e momento pa pone hechonan tras di palabranan bunita!!!

Na prome lugar UPP kier desea henter comunidad Arubano un feliz y prospero aña 2015. Un aña cu mester bay ta un aña unda e pueblo Arubano lo mester bay dicidi riba su futuro. Un aña unda pueblo lo dicidi si nan ta keda acepta y ta keda tolera un gobierno cu NO ta goberna conforme reglanan di "Good Governance".

Ta p’esey UPP, cu hopi alegria y satisfaccion, a tuma nota cu tanto AVP como MEP a declara cu nan lo bay discuti e principio di "Good Governance". Manera tin un dicho ta bisa: mihor laat cu nunca.

UPP den campaña di 2013 a trata di convence e pueblo votador cu Aruba mester wordo goberna segun reglanan democratico di bon gobernacion; lamentablemente e tempo ey NINGUN otro partido politico no kier a hiba un discusion al respecto.

Alabes den e tratamento di presupuesto 2012 y di 2013, y na augustus 2013, sr. Booshi Wever, como miembro independiente den parlamento, a entrega, na tur tres ocasion, dos mocion cu e meta pa trece cambionan den tanto nos constitucion como den nos leynan, cu e fin pa cuminza pa goberna nos pais na un manera drechi. Lamentablemente ni fraccion di AVP ni esun di MEP a vota na fabor.

Den curso di aña pasa UPP un biaha mas a trata na convence partidonan politico cu e unico manera cu nos por salba e pais aki, ta door di bin cu leynan cu ta garantisa bon gobernacion, y cu ta caba cu politica di patronahe y corupcion. Y caba cu e pensamento "quitate tu pa ponerme yo".

Un biaha mas mayoria di e partidonan politico NO a mustra mucho interes.

Pero aña nobo, bida nobo, y 2015 parce cu a start cu un bon pia door di e noticia positivo ey. Awor ta di spera cu no keda na palabra so, e no keda den Tripartite so, pero esaki por ta e momento unico pa e partidonan politico cu representacion den Parlamento bin cu leynan initiativo cu e unico meta pa "MARA MAN DI E POLITICO"!!

Si en berdad e partidonan aki ta serio, anto percura cu e leynan aki dentro di un luna wordo trata den Parlamento y pasa esakinan e ora ey den menos di 6 minuut, mescos cu a socede cu e ley cu mester a mehora e beneficionan di e parlamentarionan mas ainda.

Pues "IF YOU WANT ME TO BELIEVE IN YOUR WORDS, MAKE SURE YOUR ACTIONS MATCH THEM"!!

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, 6 januari, 2015

Expresionnan haci den e articulo aki no necesariamente ta refleha opinion di ArenaPoliti.co