Locual Mike Eman no kier splica e habitantenan. 

Manera priminti den e ultimo comunicado di MEP, nos lo sigui desenmascara Prome Ministro Mike Eman pa tur su mentira y falsedadnan cu e ta ventila diariamente contra nos partido. E biaha aki MEP lo elabora riba e desaroyo di salario minimo y tambe di pensioen di viehez, tanto bao di Gabinete Oduber como Gabinete Eman. Nos por mira riba e tabel adhunto con salario minimo a aumenta bao di Gabinete Oduber for di 1112 florin na 2001 te 1543 florin na 2009. Pues un aumento cu 431 florin y cual ta un averahe di 54 florin den 8 aña di tempo. Contrario na esaki, durante Gabinete Eman e salario minimo a aumenta for di 1543 florin na 2009 te 1678 florin na 2016. Pues un aumento cu solamente 135 florin y un averahe di un miserabel 19 florin durante 7 aña. E diferencia di e averahe di 54 florin (Gabinete Oduber) y e averahe di 19 florin (Gabinete Eman) ta bisto pa tur cu kier mira e realidad. Anto ainda Mike Eman tin e curashi pa gaba tur dia cu ta su gobierno a aumenta e salario minimo substancialmente?

Mas mentira flagrante
Pa loke ta pensionadonan soltero durante di Gabinete Oduber esaki a aumenta cu un averahe di 20 florin y pa loke ta Gabinete Eman esaki a aumenta cu un averahe di un miserabel 4 florin. Pa e pensionadonan casa durante Gabinete Oduber e pensioen di viehez a aumenta cu un averahe di 33 florin y bao di Gabinete Eman cu un miserabel 6 florin.
Awor siguramente e defensa fofo di partido AVP lo ta cu nan a duna Reparatietoeslag na e trahado y pensionadonan durante e ultimo añanan. Pero asina mes, si mester calcula un suma di 100 florin extra di Reparatietoeslag na esnan cu ta cobra salario minimo, esaki ta yega na un averahe di solamente 34 florin den 7 aña di tempo, compara cu e averahe di 54 florin bao di gobernacion di MEP. Pues cu esaki tambe un y tur por mira cu locual Mike Eman ta trece padilanti na e habitantenan di e barionan ta un mentira flagrante y cu ta muestra cu su partido AVP lo bay den historia como esun cu a masacra e clase trahado y pensionadonan na Aruba.

Ningun construccion
Ta straño cu ora cu Mike Eman bishita e barionan na Aruba diripiente e ta perde memoria ya cu e ta lubida tambe di splica e trahado y pensionadonan cu costo di bida a aumenta drasticamente durante e ultimo 7 añanan ya cu ta su gobierno a aumenta e BBO/BAZV te cu 3.5% na lugar di elimina esaki, a aumenta e prima di AOV cu 2%, a aumenta e tarifa di Inkomstenbelasting door di elimina e Inflatiecorrectie, a aumenta e tarifa di bus, a aumenta e tarifa di coriente door di Hedging, a introduci pagamento pa piki sushi y tambe pa parkeer auto, a aumenta e edad di pensioen te 65 aña, a introduci Franchise y Middelloonregeling pa e ambtenaarnan y tambe a reduci nan Duurtetoeslag.
Finalmente locual Mike Eman mester conta e habitantenan tambe ta cu durante 7 aña di su gobernacion, ningun cas social a ser construi, ningun scol nobo construi, ningun facilidad deportivo construi, ningun cas di anciano construi, ningun warda di polis construi etc.
Awor ta keda na pueblo mes pa confirma cu locual Mike Eman ta ventila contra partido MEP ta basa completamente riba mentira y falsedad y cu esaki tambe e credibilidad di Mike Eman a baha te na cero. MEP lo sigui desenmascara Mike Eman.

Expresionnan haci den e articulo aki no necesariamente ta refleha opinion di ArenaPoliti.co