Benny Nisbet (PPA): “Gobierno y parlamento lo a aproba cu ora ta trata ‘contratista y nan trahado’ esaki lo ta na Citgo NV su ‘absolute discretion’…!”
Ultimo siman nos por a tende y lesa di preucupacion di un miembro di parlamento pa cu e hecho cu supuestamente un total di 60 trahador Venezolano lo a hanja tur documento regla pa traha den nos futuro ‘upgrader’ esaki sin cu esnan encarga lo a tuma trahador Arubiano ainda ?
Ministro Paul Croes a contesta cu lo no ta berdad cu tin trahador ja kaba lo ta bin di exterior !!
Mientras tanto rumornan persistente ta jega PPA cu lo a drenta un peticion di un contratista local pa regla 400 permiso pa trahador di Venezuela y cu esaki lo ta di un compania cu laso na un di e ministro/makelaar di gab. Mike Eman y internamente ta worde traha riba e documentonan aki.
PPA ta desea di referi na e hecho cu parlamento casi den su totalidad (20 versus 1) a vota ‘pro’ e acuerdo cu gobierno di Aruba Eman/de Meza a negocia cu CITGO Aruba !
Den e contract aki ta worde menciona segun PPA por a comprende:
- Cu gobierno a jega na un acuerdo cu CITGO NV cu ora ta trata trahado cu ta worde emplea ‘directamente’ pa traha pa CITGO Aruba , CITGO Aruba NV lo mester emplea 80 % di trahado local y lo mag di trece 20% di trahado for di exterior !! Esaki a worde aproba pa e 20 miembro di parlamento !!
- Pero ora ta trata ‘contratista’ y aki ta unda e ‘rabo di e porco ta krul’ ….ora ta trata di tuma contratista den servicio di CITGO NV esaki lo ta na ‘descreccion completo’ esta ‘to their absolute discretion’ ! Esaki tambe a worde aproba pa e 20 miembro di parlamento !!
- Ora ta trata e trahado cu lo traha pa e contratista aki…..e ta na descreccion absoluto esta ‘to their absolute discretion’ esta di CITGO NV …..y cu na mes momento ta para den e acuerdo cu gobierno di Aruba ta mara ( y esaki cu bendicion di tur 20 parlamentario cu a vota ‘pro’) pa duna CITGO Aruba NV tur cooperacion y tur permiso necesario pa e trahadonan aki nan estadia y trabao y esaki lo durante e periodo di e acuerdo esta 15 anja cu por worde alarga cu dieza anja !!
Awor mester mira e trabao cual lo worde ejecuta pa ‘transforma’ e refineria den un UPGRADER los for di e trabao pa e CITGO/upgrader mes. Fase 1 e periodo di transformacion pa cual lo mester mas tanto ‘contratista’ y nan trahado’ CITGO tin tur libertad. Sigui pa fase 2 dentro di cual lo tin mester un cierto cantidad di trahado directo den servicio di CITGO Aruba y algun contratista cu lo mester continua cu cierto trabao specifico durante e periodo di 15 anja. ( cu por worde alarga cu 10 anja).
For di inicio e ‘rabo di e porco ta krul’….. pasobra Parlamento di Aruba casi den su totalidad a bendiciona e acuerdo aki, sin trece cambio cual ta pone e existencia di ‘compania local’ totalmente den man di CITGO y cual ta hinca e posibilidad pa tuma cuanto trahado di exterior pa ejecuta fase 1 cuanto cu nan kier di exterior y gobierno Eman/de Meza a propone y parlamento a aproba.
PPA y sigur pueblo di Aruba semper ta habri pa mas informacion….si locual nos ta bisa lo no ta cuadra anto proba esey na pueblo y na PPA, pero di locual nos tin na informacion CITGO no ta mara na un plafond ni na un porcentaje ora nan ta trece ‘contratista y nan trahador’ di exterior. Tanto durante e prome como e di dos fase. E ta na CITGO cu ‘ their absolute discretion’ y ningun poder a keda den man di gobierno/ministro di labor pa para of frena esaki …al contrario nan a firma cu nan lo duna tur permiso pa estadia y trabao y lo coopera cu CITGO den tur sentido di palabra. Con nan lo por proteja nos contratista y trahado local ta un pregunta hopi grandi cu tin nos di PPA preucupa ?? Esey bo ta hanja or abo trata un contract di un peso asina (di mas cu 2000 pagina) dentro di un par di dia y bo no ta duna parlamento un copia debido pa nan por studia pero ta trata nan manera mucha di scol cu mester worde controla pa coordinador di gobierno/staten.
Palabra ta na gobierno y parlamento pa coregi nos. Pesey PPA cu tur respet no a comprende tanto celebracion sin cu e ‘derecho di nos contratista y trahado local’ ta debidamente regla y protehi den e acuerdo aproba pa parlamento esta cu a vota PRO !! Nos ta ripiti solamente pa e trahado cu lo traha directamente pa e CITGO (upgrader) Aruba NV ta conta un plafond di 80 % local y 20 % di exterior pero no pa e contratista ni pa su trahadornan local !! Y pesey PPA ta di opinion cu lo tin bastante tencion den futuro ora tanto contratista local como trahado realisa cu e situacion no ta realmente na nan fabor pero tempo lo demonstra esaki.
Aruba, 5 di november 2016
Lider Politico di PPA
BENNY NISBET
Expresionnan haci den e articulo aki no necesariamente ta refleha opinion di ArenaPoliti.co