MINISTER MICHELLE HOOIJBOER-WINKLAAR REALMENTE NO SA NADA DI ONDERWIJS. 

Parlamento a trata e presupuesto di enseñanza dialuna y diamars. Diamars a toca turno na minister pa contesta, y realmente desde comienso por a constata cu e no sa mes kiko e ta papia di dje. Ni lesa e por a lesa e contestanan cu su conseheronan a traha p'e. Michelle Hooijboer-Winklaar realmente ta un berguensa pa mundo di enseñansa. Esnan cu realmente kier a sigi e reunion, no por a volg e minister, pasobra tabata obvio cu e no tabata sa di kiko e tabata papiando.

Bo por a hasta kere cu ta di enseñanza di Merca of Canada e ta papia pasobra ta esey so e ta promove. E no ta compronde cu mayornan kier tende di enseñanza di ARUBA, pasobra ta aki nan yiunan ta bai scol.

FUNCTIEHUIS
Pa loke ta trata e functiehuis, cu lo mester regla e salarionan di docentenan, e mundo di enseñanza a haya un shock di tende cu e lo wordo introdusi aki dos luna, y ta awor numa a cuminsa papia cu esnan concerni. Asina nunca gobierno ta keda cla na tempo.

PRESUPUESTO DI LAND ARUBA A BAHA NA 2017
Un otro remarke cu a hala hopi atencion tabata e remarke di Hooijboer-Winklaar cu e presupuesto di 2017 di gobierno a baha compara cu 2016. Aparentemente Hooijboer-Winklaar sea tin un problema cu rekenen, of e no a studia e presupuesto, pasobra manera por mira riba e grafico adhunto por mira cu e gastonan di land Aruba a aumenta pa 2017 cu 63 miyon florin!

NIVEL DI HOOIJBOER-WINKLAAR TA HOPI BERGONSOSO
Parlamentarionan tabata mucho mihor prepara. Tur e juffrouw cu meneernan di scol den parlamento a duna nan aporte constructivo.
Sinembargo e minister mes a keda leew di nivel den enseñansa. Hopi ta puntra nan mes ta dicon Mike Eman a hasi Michelle Hooijboer-Winklaar minister, siendo cu tin asina tanto juffrouw y meneer di scol mucho mihor prepara cu Michelle Hooijboer-Winklaar pa asumi e funcion ey. Cu un minister cu no sa nada di e materia y cu tin masha poco interes pa enseñanza na Aruba, no ta bale la pena perde tempo pa debati, pasobra e no por contesta nada toch! 

Expresionnan haci den e articulo aki no necesariamente ta refleha opinion di ArenaPoliti.co