Glenbert Croes premirando ACCION ORA CERO 2:

Constatando cu Citgo ta cooperando y ta complice di e proyecto politico partidista di Gobierno di AVP unda cu den un reunion na Centro di Bario Lago Heights a wordo bisá na e trahadornan cu a solicita na Citgo y na e contratista ligá na AVP: esun cu ta cu Glenbert no ta drenta, pero esun cu ta cu AVP si ta drenta Citgo.

Unico manera cu Gobierno di AVP tin e poder aki ta door di e complicidad y cooperacion di Citgo. Esaki nos no ta acepta. 

Nos ta procede na duna Citgo y Gobierno di AVP e advertencia politico: Cuminsa contrata trahadornan Arubiano local awor. Cuminsa contrata contratistanan local awor.
Si encaso Citgo, Citgo Aruba y Gobierno di AVP no tuma e advertencia aki na serio, e mesun digno pueblo cu a lanta den Accion Ora Cero pa impedi Valero y Gobierno di AVP desmantela e refineria, e mesun digno pueblo aki nos lo lanta atrobe den un Accion Ora Cero 2 pa exigi Citgo y Gobierno di AVP cuminsa contrata trahadornan local y contratistanan local awor sin distinccion. 

Ta imposibel compronde cu Gobierno di AVP no ta sinti e dolor cu e trahador Arubiano cu a perde trabao den e refineria ta sinti envista di su necesidad precario cu e ta den sin por haya trabao bek den e refineria di nos pueblo y Gobierno di AVP no ta haci nada pa nan.
Ta imposibel compornde cu Gobierno di AVP no ta sinti e dolor cu e contratistanan local cu a perde nan trabao den e refineria ta sinti envista di e necesidad cu nan ta aden y Gobierno di AVP y Citgo ta manera no ta compronde nan dolor.

MEP y nos pueblo a lucha den Accion Ora Cero duro pa asina logra rescata e refineria y asina pone nos juinan di tera bek na Aruba. Y nos ta agradecido cu e asercamento cu PDVSA y Venezuela a logra rescata e refineria pa beneficio di Aruba y Venezuela.

Pero awor mester pone accion tras di e palabranan y e acuerdonan. E regla 80 – 20 ta  bisa cu di cada 100 trahador 80 lo ta jui di tera y 20 lo ta di exterior ora mester.

Nos sa cu trabaonan a cuminsa caba pero no ta contratando nos juinan di tera. Politikeria  a daña hopi cos na Aruba, y awor Gobierno di AVP y Citgo ta haciendo politikeria cu e refineria di nos pueblo cu a wordo rescata pa nos pueblo trahador haya un oportunidad bek pa un miho bibá. E politikeria actual den e refineria ta bay asina leu cu politicamente Gobierno di AVP ta dicidi pa Citgo Aruba ken por participa den bidnan y ken ta gana e bidnan. Esaki pa nos di MEP ta totalmente inaceptable.
E refineria di nos pueblo di un proyecto pais cu MEP a lucha pe awor ta un proyecto partidista. Inaceptable.
Nos ta procede na duna Citgo y Gobierno di AVP e advertencia aki. Si boso kier tené na cuenta y corigi, sino sufri e consequencianan. Accion Ora Cero 2 na caminda.

Glenbert f. Croes
Miembro di Parlamento Fraccion di MEP

Expresionnan haci den e articulo aki no necesariamente ta refleha opinion di ArenaPoliti.co