Relaciona cu e situacion di Insel Air Aruba, lo tin un reunion di e comicion permanente di Parlamento unda nos lo bay trata e desaroyo preocupante na Insel Air Aruba. Di parti di MEP nos ta kere cu e meta di e discusion mester ta centra riba yuda nos pueblo pasahero di Insel Air Aruba yega su destino y alavez apoya e trahadornan di Insel Air Aruba door di sigura continuidad den e operacionnan di Insel Air Aruba. 

Nos tin confiansa den e departamento di aviacion civil  di Aruba unda nos a mira nan tuma e decision dificil hasta di ground 5 di e avionnan di Insel Air Aruba. Nos ta apoya nos departamento di aviacion civil pasobra di ningun forma por sacrifica e interes di siguridad den aviacion pa niun interes economico.
Siguridad den aviacion ta bay na promer luga semper pa siguridad di e personal di Insel Air Aruba, su pilootnan y e pueblo pasahero. 

Insel Air Aruba a bin ta asumi e rol hunto cu e Insel Air di ta e aerolinea principal pa transporta nos hendenan entre Aruba, Corsow, Bonaire y St.Maarten.
Famianan na Aruba, Corsow, Bonaire, St.Maarten, Saba  y St.Eustatius ta depende di Insel Air pa yega nan destino principalmente teniendo na cuenta tur e famianan cu ta viaha entre nos islanan y isla riba.

Nos kier sa kico gobierno di Aruba ta hacienda. Nos tin e sentimiento cu gobierno mes na nivel di conseho di ministro no ta haciendo nada nada nada pa yuda e trahadornan di Insel Air Aruba y nan no ta haciendo nada pa sigura continuidad den e servicio aereo pa tur pasahero yega nan destino.
Nos a tuma nota di tur retrasonan cu tin cu ta totalmente inhusto cu e pueblo pasahero. Y situacion nan ey no por keda ripiti.

Pesey mi kier ripiti nos confiansa cu nos departamento di aviacion civil di Aruba lo haci nan trabao den sigura cu e metanan manera ariba resalta lo wordo cumpli cu ne. Nos lo ta alerta y pendiente di e desaroyonan di Insel Air Aruba pa sigura cu den cualkier eventualidad e pasonan necesario lo wordo tuma pa sigura cu e operacion aereo pa Aruba Corsow, Bonaire y St.Maarten keda e conexion aereo semper.

Expresionnan haci den e articulo aki no necesariamente ta refleha opinion di ArenaPoliti.co