Mireille Sint Jago (MEP): Na Hulanda mes nan a bin realisa cu un Cas di Funcion no ta Funciona!
Functiehuis ta un sistema pa HR cu ta yuda un organisacion stipula exactamente kico ta e trabou di cada funcion, e diploma cu un trahador mester pa por ehecuta e trabou y e pago cu un funcion asina merece. Ora cu e organisacion tin su material, personal y cliente, pues su fundeshi, muraya y dak, nan lo desea pa crece y na dado momento yega na un organisacion mas structura.
Aki mi ta bay trata 4 motibo pakico Enseñansa na Aruba falta e fundeshi pa e 'Cas di Funcion':
1) Aruba conoce hopi scol chikito. Si no por haci diferente funcion mas, e cantidad di docentenan cu lo mester traha na mas cu un scol den educacion secundario, pa nan cera nan oranan pa un volledige betrekking, lo subi. Esaki ta kita e cement di un scol pa cu control social cu nos mester pa por tin e mihor bista riba e alumnonan. Nos alumnonan no ta mesun independiente manera esnan na Hulanda, door cu nos no ta brinda nan e oportunidad ey den nos sistema di educacion. Nan mester di mas guia y stabilidad. Asina e dak di e functiehuis lo keda lek!!
2) Esey ta crea un peso mas grandi pa cu e trabou di tur docente y na e mesun momento e lo baha e cantidad di contacto social entre e docentenan y alumnonan. Mas stabilidad na un scol ta trece un miho comunicacion entre e docentenan y ta brinda un miho ambiente social y pedagogico pa nos alumnonan. Asina e murayanan di e functiehuis ta scheur!!
3) Functiehuis tin e pensamento idealistico cu tur hende cu ta den un funcion ta cualifica y certifica. E situacion realistico ta cu na Aruba mayoria di e cursonan necesario pa crece y pa yega e siguiente piso di e functiehuis, no ta disponibel na Aruba. Ademas, si bo caba un curso online bo no tin garantia cu e papel ey lo wordo reconoce. Mester cosnan asina cla, mester tin e fundeshi cla pa traha e cas di funcion riba dje.
4) E parti mas importante aki ta, cu un scol ta un organisacion cu ta traha cu e ser humano mas vulnerabel den nos comunidad: muchanan/hobennan. Tanten cu nos no a logra crea un sistema di educacion cu ta esun cu ta laga nos muchanan ta mas exitoso, brinda nan y nan maestronan e miho material, nos lo mester ni cuminsa pensa di traha un cas di funcion.
Pakico ta bin toch cu e 'functiehuis'? Pakico ta introduci esaki, caminda na Hulanda mes a bin realisa cu un Cas di Funcion no ta Funciona? Cu organisacionnan mester di mas flexibilidad? Pakico ta bay asina leu di reduci e conocemento di nos hobennan, door di baha e cantidad di materia den 3e klas? Pakico Minister Hooijboer-Winklaar no ta inverti den Enseñansa di Aruba, pero ta hisa schoolgeld, corta den e presupuestonan di Colegio, IPA y Universidad, corta den lessentabel y corta den e oranan di nos como maestronan?
Maestronan, eleccion ta na caminda y e ta importante pa ken nos ta vota. Pa mi e ta obvio cu e Gobierno aki no tin e bienestar di nos muchanan na pecho. Nos tin cu vota pa un hende cu tin conocemento y curazon pa educacion! E ora ey so nos lo wak cu idealismo lo vence den enseñansa tambe.
Expresionnan haci den e articulo aki no necesariamente ta refleha opinion di ArenaPoliti.co