Nos por a comprende cu durante e evenemento organisa pa ATIA cu esnan cu a hiba palabra a usa e sigiente terminologia: ‘lo bai rehabilita e refineria’……ora e periodo di rehabilitacion termina etc etc etc..

PPA mester conclui cu aki tin wega di palabra ….anto wega di palabra pa domina y influencia pensamento di esnan presente pero pueblo indirecto tambe.

A cambia e uso di ‘terminologia’ pa crea impression di kiko realmente lo bai tuma lugar.

Na prome lugar Aruba desde 1927 tabatatin un refineria te na 1986, awor kiko ta e concepto di un refineria ? Un refineria ta un instalacion cu ta rafina crudo y ta crea productonan di valor esta productonan cu valor agrega.

Awor kiko ta un Upgrader….un Upgrader ta un fascilidad cu ta procesa e ‘extra heavy crude e.o. bitumen of tar/lodo’. E asina jama crudo aki no ta ‘vloeibaar’ e no por pasa door di pipa….e meta di un ‘upgrader’ ta pa procesele di tal forma cu e ta bira ‘vloeibaar’. Despues di e ‘upgrading’ aki e crudo aki ta worde manda pa refinerianan cu si lo bai refina esaki y crea productonan di valor.

Cu otro palabra den ningun concepto e fascilidad di Aruba lo keda un refineria !! Pa usa terminologia asina manera ‘rehabilitacion’ di nos refineria’ ta simpelmente tuma esnan presente y pueblo di Aruba hasi y PPA ta lamenta esaki den tur sentido di palabra.

Y pa loke ta trata e hecho cu awor nos ta 4 luna despues di e fecha cu supuestamente e CITGO NV lo a inicia cu su funcionamento y pueblo no ta mira nada. E cambiamento di nomber na e sitionan unda ta bende gasoline no por worde considera ‘net’ nada pasobra esaki a keda den man di ‘Refineria di Aruba NV’ cu ta un nv di gobierno. Locual pueblo ta desea di mira ta e trabaonan cu ta conduci na ‘transformacion di e fascilidad’ den un Upgrader manera e acuerdo ta bisa. Y pueblo mester remarca hasta un inicio di e trabao aki lo no ta un ‘garantia’ cu e Upgrader lo habri y funciona ainda. Pasobra por ricibi un parti di e fondo…ta inicia cu e transformacion…anto derrepiente e sigiente parti di fondo no ta bin…!! Anto no mester exclui cu tur cos lo ta mustra ‘positivo’ durante e periodo prome y durante di eleccion anto despues di eleccion cu ta ‘dal’ para…. E wega a worde hunga y un bon parti di comunidad a cai den djele. Pa evita e wega aki mester inicia ora e fondo completo a worde deposita na un banco local pa e ‘transformacion’ di e fascilidad den un Upgrader.

Mas splicacion riba cual PPA tin su opinion ariba ta lo sigiente: Derepiente durante e descursonan na e evenemento aki nos por a comprende cu lo trata di ‘dos’ fase. Un di ‘dos’ anja y despues un otro di ‘dos’ anja pa jega na e rehabilitacion/transformacion di e supuesto refineria cu nos ta un Upgrader. Esaki segun nos ta ilustra e problema probablemente affecta pa e crisis financiero den PDVSA pasobra tur e tempo prome y aki nos kier referi na declaracionan hasi pa varios autoridad local y ejecutivo cu a papia di dos fase …e prome di 18 luna pa cumpli cu e ‘transformacion’ y despues lo sigui cu fase dos cu lo ta e funcionamento di e Upgrader mes cual lo dura en principio pa 15 anja y por worde alarga cu 10 anja. Tur esaki ta simpelmente pa tapa e realidad di e ‘aventura’ den cual a hinca otro. Negociando un acuerdo cu un partner cu visiblemente ta den un problema financiero hopi serio.

ARUBA A SALI MENOS BENIFICIA DEN HENTER E ACUERDO AKI !!

PPA kier a referi na e sigiente frase den un documento tocante Alberta Canada unda tin un discussion con Alberta, Canada a perjudica su mes y a duna e miho cuponan di trabao na Texas, USA, PPA ta cita:

“The PC’s have squandered Alberta’s resource wealth. They have done by neglecting our opportunity to invest in value-added processing and refining- investments that would create more jobs in Alberta instead of exporting them to Texas, USA. We’ll reduce our provence’s over-dependence on raw bitumen exports and create more jobs with more upgrading and processing here, rather than in Texas. “Alberta NDP platform”.

Cu otro palabra unda e refineria ta y ta worde refina tin e cuponan di trabao di calidad unda tin Upgraders tin e trabaonan di menos calidad.

Sigiendo cu e analisacion…..e acuerdo cu a worde negosha entre Gobierno di Aruba, CITGO na Houston y Venezuela a duna un resultado cu si bo analisa bon …no por worde considera un ‘win win situation’ pa Aruba. Aruba a hanja e trabao di mas sushi cu mas dolor pa nos salubridad publico y cu menos cupo di trabao di calidad. Venezuela a logra un ‘upgrader’ casi por nada….un parti di nan ‘extra heavy crude’ cu tur su dolornan ta worde pasa pa Aruba ……y CITGO na Houston lo ricibi e crudo procesa pa Aruba y cual lo worde refina pa CITGO Houston cual ta nifica cu e cuponan di trabao di calidad a keda na Merca !!

Lo tin hende…..cu lo ta rabia cu PPA pa nos informacion cu nos ta duna pueblo….lo tin hende cu lo jama PPA pa hende cu no ta professional riba e tereno aki……wel nan asunto….PPA ta hasi su ‘huiswerk’ y PPA tin ingeniero tanto den nos seno como cu ta duna nos nan opinion al respecto. PPA ta para pa locual nos ta informa nos pueblo.


INVESTIGACION NA HULANDA …2DE KAMER !!

Mientras tanto tin un investigacion tumando lugar na Hulanda riba e ‘risico’ cu Aruba ta core den e aventura di e acuerdo cu CITGO/PDVSA. Aparentemente Min Pres Mike Eman a pidi hulanda pa tene e resultado aki secreto. Pero kere PPA cu e rapport aki lo sali den publicidad dentro di poco y e resultado lo demonstra cu e unico partido cu tabatatin razon pa a cuestiona e acuerdo aki profundamente y constantemente ta partido PPA. Aruba No mester a bai den ningun acuerdo cu un ‘upgrader’ e consecuencianan tanto financiero pero tambe riba tereno di salud publico lo resulta fatal !! PPA ta sigui tene tanto gabinete Mike Eman y especialmente Ministro de Meza pero tambe e 19 miembro den parlamento cu a vota PRO un contract pa cual nan no a hanja suficiente tempo pa studia etc…especialmente oposicion cu no a hiba un oposicion pero a pretende di ta gobierno esta cu nan a logra e acuerdo aki y consecuentemente ni con malo e ‘deal’ aki ta nan tabata mara door di nan wega cu ta nan a logra pa a vota PRO y awe Aruba ta sinta cu otro Aventura cu lo hiba nos den un situacion peor cu tempo di ‘aqua nova’ y tempo cu Aruba a para garantia ….y e otro escandola di e ‘racetrack’ ….esaki lo tin consecuencia desastroso financieramente pa Aruba si algo bai robez. Na mes momento PPA lo tene Hulanda tambe parcialmente responsabelo pa e consecuencianan desastroso cu por resulta di esaki.


Aruba, 14 di December 2016
Lider Politico di PPA
BENNY NISBET

Expresionnan haci den e articulo aki no necesariamente ta refleha opinion di ArenaPoliti.co