Pueblo di Aruba, ta bon pa nos busca e significacion real di e palabra prosperidad. Esaki ta significa bienestar, mehoracion di e situacion economico of social. Den 2015 e economía di país Aruba a sufri un caída di -0.5%. Den 2016, e actividadnan economico practicamente a paralisa considerablemente. Segun e propio Banco Central di Aruba, economia di pais Aruba den 2016, a krimp cu 1.6% den e di dos kwartaal di aña. Esaki pa motibo di un caida den turismo, no tabata tin inversionnan haci y un consumo domestico hopi abao. Lesando y comprendiendo esaki, pueblo por conclui cu NO tabata tin prosperidad na 2015 y ni na 2016. Esaki door di mal maneho, incapacidad gubernamental di gobierno di AVP. Na comienso di 2017, PM Eman ta sali bin afo manera e bon Samaritano, partiendo un supuesto prosperidad cu enberdad Eman no tin. Atrobe mi tin cu bisa cu PM Eman no ta un mago! E no ta un tovenaar. E no por crea prosperidad si e mes particularmente a desgracia pais Aruba financieramente te cu e isla a perde su autonomia financiero. Aña 2017 a caba di cuminsa cu un caha bashi di berdad y pa colmo Aruba pata pata di debe. Anto PM Eman ta reparti prosperidad? Di unda PM Eman a haya esaki? E contesta ta cu Eman su gobierno a introduci MEDIDANAN riba e clase trahador di pais Aruba, cual fondonan Eman ta bay reparti pa esnan cu segun Eman, por haci’e gana eleccion 2017. Sacrificando e clase trahador pa keda na mando. Pa colmo, Eman ta sali afo proclamando cu ta e ta esun cu a crea prosperidad y ta e a parti esaki pa 19.500 pensionado fin di aña. Tambe nan ta haya un aumento di 2.3% manera anuncia. Pregunta di oro: Cu cuanto porciento gobierno di AVP a subi e prima di AOV/AWW cu ne durante e ultimo tres añanan? Pues un medida riba e clase trahador. Awor PM Eman ta coy e placa for di e trahadornan y haci campaña politico cu ne. Pret ta cu e sindicatonan ta sigui hari cu PM Eman den esaki. E pakete politico ta encera aumento di e schoolkinderentoeslag, aumento di bijslag, rebaho di coriente, reduccion di gastonan di studielening y e rebaho te na dies florin pa esnan di menos recurso pa recogemento di sushi. Nada tin den esakinan pa e clase trahador. Coriente despues di hedging haciendo coriente masha caro mes pa tres aña. Paga pa sushi pa Gabi Werleman biba dushi, door di huur e edificio na Paradera. PM Eman su plan macabro ta simplemente pa haci TUR trahador mas pober y esnan di menos recurso, mas dependiente di su persona. Esclavitud y prostitucion moderno ta keda chikito banda di loke PM Eman ta haciendo cu su pueblo. Esaki ta keda posibel te dia cu e propio pueblo di Aruba bisa PM Eman: “TA BASTA”. E oportunidad ta den e aña electoral aki unda e pueblo tin e poder pa actua y manda e gobierno di AVP cas bek.

Expresionnan haci den e articulo aki no necesariamente ta refleha opinion di ArenaPoliti.co