Den e acostumbrado conferencia di partido MEP, Parlamentario Glenbert Croes a elabora riba e ultimo desaroyonan entorno PDVSA CITGO y trahadornan y contratistanan local. Sr Glenbert Croes ta bisa lo siguiente:

“Cu e ultimo noticianan cu mi a ricibi ta bira un hecho final cu PDVSA CITGO lo no cambia nan relacion di “enchufe politico” cu ministronan di AVP. PDVSA CITGO ta dunando AVP e plataforma politico contra nos digno pueblo y contra MEP cu a lucha pa rescata nos refineria y habri’e back.

PDVSA CITGO ta patrocinando e campaña di ministronan di AVP, PDVSA CITGO ta privilegiando “malcriando” e companianan diki diki ligá na ministro di AVP, pero na mes momento niun di e trahadornan local y contratistanan local no ta haya un oportunidad husto pa drenta pa traha den e refineria.

Gabinete Mike Eman/PDVSA/CITGO a bira lomba pa pueblo trahador y contratistanan local na Aruba. Ta un hecho cu ta e 3 companianan diki diki ligá na e tres ministronan di AVP so ta hayando tur e trabao. Manera den e caso di e contract di Scaffold unda e compania europeo ta wordo presiona pa traha cu e compania di un di ministernan lagando 10 contratista local un banda cu tambe por haci e trabao. Inaceptabel.

Esaki ta pone cu mi ta anuncia na henter nos digno pueblo di Aruba cu nos ta bay den fase di alerta en espera di e resultado di e ultimo esfuerzonan na nivel mas halto politico na venezuela pa para y elimina e pacto di PDVSA CITGO y Gabinete Mike Eman di privilegio pa e grupito di AVP envez di ta enfoca na pone nos yuinan di tera trahadornan local y contratistanan local back na trabao den e refineria.

Nos ta pidi nos pueblo pa keda pendiente pa e boletin extra cu lo convoca e reunion extraordinario cu caracter di urgencia si en dado caso esfuerzonan na venezuela no resultá pa asina immeidatamente nos tuma e decision di activa Accion Ora Cero fase 1, 2 y 3 pa wordo ehecuta simultaneamente.

Mi ta keda cautelosamente optimista y esperansá cu gobierno di venezuela y e consorcio internacional cu a gana e bid pa financia, rehabilita y construi e refineria/upgrader nobo, si lo tende e clamor di henter nos digno pueblo pa asina finalmente tur trahador local y contratista local drenta y a haya trabao back den e refineria di Aruba cu awor ta e refineria di henter nos pueblo pa henter nos pueblo. Nos ta den fase di alerta”, Parlamentario Glenbert Croes ta termina ta bisa.

Expresionnan haci den e articulo aki no necesariamente ta refleha opinion di ArenaPoliti.co