MEP: Pueblo hopi contento di por saluda lider di MEP Evelyn Wever-Croes
Su popularidad a crese hopi mas debi na e atakenan sushi di parti di AVP y DIARIO
Por a nota un asistencia mucho mas grandi na Cede di MEP compara cu otro anjanan na momento di yena formulario di belasting. Hopi hende cu a acudi na Cede djis pa saluda lider di MEP, pa dun'e un abraso fuerte. Hopi hende cu ta sinti dolor pa e atakenan feros di AVP y DIARIO contra Evelyn y su casa, tabata hopi contento di por a saluda Evelyn y su casa Kenneth na Cede diahuebs anochi.
Un muestra di carinjo y di convivencia di parti di un pueblo pa su lider. Hopi tabata puntra ta dicon AVP y DIARIO a cuminsa un atake asina sushi? Ta djis pasobra Evelyn ta papia berdad? Of acaso ta pasobra Evelyn a biaha bai Hulanda y a haya un trato aya digno di un lider di un pais? Cualquier cu ta e motibo, un cos esnan cu a presenta na Cede tabata di acuerdo: un hende drechi y integro manera Evelyn no merese e atakenan aki. Cu e tata di Evelyn a apodera Evelyn riba su cuenta, ta algo cu hopi hende grandi ta hasi, nan ta apodera nan yiu pa cobra pensioen pa nan. Kiko malo tin den esey? AVP ni DIARIO no a presenta NINGUN prueba di algo contra ley, mucho menos labamento di placa. Pa e sostenedornan di MEP ta obvio cu e atakenan aki ta intentonan infantil pa desvia atencion di e CFT y di e exito cu Evelyn a cosecha na Hulanda. Y pesey nan aprecio y respet pa cu nan lider ta mas grandi cu nunca.
Expresionnan haci den e articulo aki no necesariamente ta refleha opinion di ArenaPoliti.co