Aruba mester keda den e rol cu ela adkiri den ultimo añanan!

E rol di tuma iniciativa pa trece paisnan hunto y set trendnan positivo den Reino, ta un rol cu Aruba a adkiri y a desplega bon den e ultimo cinco aña. Aruba tin cu sigui den e rol aki. Mas lihe posibel mester percura pa Aruba ta bek den e rol aki. E conflicto cu nunca mester a yega asina leu, mester finalisa mas lihe posibel. Tin cu traha hunto pa logra esey.  Esaki ta segun Rene Herde' algun di e conclusionnan cu por saca di e ultimo reunionnan cu e a tene e siman aki na Hulanda.

Un di e ultimo reunionnan tabata cu e miembro di e fraccion di Christen Unie cu ta miembro tambe di e Comision di Asuntonan di Reino di Parlamento Hulandes, sr. Gert Jan Segers. E ta un politico hoben cu a adkiri e fama caba di ta masha cla den loke e bisa y ta demostra un sentido ethico y un rectitud ehemplar. Como miembro di e fraccion di e partido progresista christian Christen Unie, e ta miembro activo di e comision fiho pa asuntonan di Reino. Den e reunion aki a combersa riba tur e temanan politico, financiero, economico y social cu ta actual den e relacion cu Hulanda. Na januari 2014 sr Gert Jan Segers probablemente lo ta na Aruba tambe pa reunionnan di Reino.

Expresionnan haci den e articulo aki no necesariamente ta refleha opinion di ArenaPoliti.co