E hot topic di siman ta Minister Paul Croes, e caso rond di dje y opinionan riba kico su next move mester ta.
Pero nos a scucha masha tiki tocante con pa preveni e tipo di situacionan aki, specialmente ora e actonan menciona den e caso contra Minister Paul Croes y otro acusadonan por tin un efecto grandi riba e bida di hopi ciudadano.
Un ehempel ta cu cuponan di trabou ta wordo yena dor di hendenan di exterior sin check debidamente si tin localnan cu por hasi e trabou, asina kitando pan for di nos mesun hendenan.

Personalmente lo mi kier scucha mas tocante di e Checks & Balances den nos sistema y aparato gubernamental.
Pa hopi aña politiconan ta menciona e frase Bon Gobernacion (Good Governance), y mi tambe ta di acuerdo cu si kier preveni of mihor bisa elimina comportacion corupto den nos aparato gubernamental mester cuminsa sigui e principionan di Bon Gobernacion (Good Governance).

Pero con?
Un manera cu mi ta mira ta dor di usa technologia pa elimina fayonan humano (manera vriendjespolitiek y corupcion) y promove integridad, responsabilidad (accountability), y transparencia den sector publico.

Ehempelnan con Technologia lo por yuda...
Tur decisionan, cambionan, etc. riba permisonan lo wordo registra bou di e nomber di e empleado cu ta tumando e accion. Si pa un motibo of otro e peticion wordo aproba sin cu el a pasa door di tur e stapnan necesario, of si un peticion wordo nenga sin base oficial, of si tin cualkier otro accion iregular, lo e sistema por detecta e hechonan dudoso ora e ta "run su system check", un audit riba e sistema lo divulga e iregularidadnan tambe.
Di e manera ey lo e empleado wordo responsabilisa riba su posibel actonan ilegal.

Tambe sistemanan cu inteligencia artificial por detecta posibel fraude, por ehempel entradanan fictioso of abnormal door di empleadonan. Nengamento intencional of infunda tambe ta un ehempel di accionan cu e sistema lo por detecta.

Cuidadanonan lo por manda peticionan y kehonan via e sistema na un manera automatisa.
Na mes momento lo por sigui e proceso di e peticion pa mira con leu e ta y haña feedback riba kico falta.
Lo por sigui e proceso di e keho tambe y duna informacion extra si ta necesario.

Di e manera aki usando technologia ya obtenibel, por sigura cu e Checks & Balances ta na su lugar y cu nos como cuidadanonan no tin cu roga pa algo cu ta nos derecho.

Expresionnan haci den e articulo aki no necesariamente ta refleha opinion di ArenaPoliti.co