Invadi Cas di Ministro 
Riba 28 di maart ultimo Ministerio Publico a invadi 13 establecimento. Entre otro a invadi cas y oficina di e sospechoso, sr. Paul Croes, Ministro di Labor. E invasion aki ta basa riba un investigacion preliminario di hechonan, un asina yama ‘feiten-onderzoek’. E ‘feitenonderzoek’ a converti den un investigacion penal, un ‘strafrechtelijk onderzoek’. E sospecho di e investigacion ta relaciona cu soborno y labamento di placa.

Trahador ilegal 
Na cas di e Ministro a topa cu un trahador ilegal. A detene e persona aki y a deport’e pa su pais natal. Cu e Ministro mes, kende ta institui ilegalidad y ta comete infraccion contra ley, den e caso aki nada no a pasa.

Accion di Ministro 
Ministro despues di e sucesonan aki, esta invasion na su cas y detencion y deportacion di un ilegal, a papia cu Prome Ministro y e dia siguiente a pone su mes riba ‘non-actief’. Un acto ridiculo, un acto ilegal, te hasta un acto anti-constitucional. E ta mantene su poder como Ministro, djis e no ta trahando activamente. Ami ta convenci cu e ta sigui traha tras di cortina y ta ‘business as usual’ manera e dicho ta na Ingles. E ultimo aki ta haci’e un acto inmoral.

Integridad di Gobierno 
Gobierno como Organo Ehecutivo mas halto di Pais Aruba ta perde cara, pa falta di integridad di e Ministro y pa falta di integridad di e Prome Ministro. E hecho cu e Ministro di Labor mes tabata tin un ilegal ta traha p’e, a wordo gara pa autoridad competente, ta motibo suficiente pa su persona retira como ministro. Prome Ministro cu tambe ta na altura di e hecho aki mester a conseha e Ministro di Labor pa entrega su retiro na Gobernador. E mester a pidi audiencia cu Parlamento pa kita confiansa den e Ministro di Labor.

Palabra ta na Parlamento 
Despues cu Ministro di Labor y Prome Ministro a actua ilegal, anti-constitucional y inmoral awor e palabra ta na Parlamento. Fraccion di MEP a actua corecto y diligente pa pidi un reunion, cu caracter di urgencia, tocante e asunto bergonsoso aki. Presidente di Parlamento, pa falta di seriedad y honestidad, ainda no a yama e reunion. E reunion no ta pa discuti e investigacion penal. Esey ta den man di Ministerio Publico. E acusacion di soborno y labamento di placa ta bergonsoso si pa un Ministro. E pregunta cu parlamento mester debati riba dje ta: Sr.Paul Croes por keda funciona como Ministro, awor cu a gara un ilegal den su cas, di cual e tabata sa di dje? Corda cu su persona ta e mandatario cu ta duna permiso pa hende traha na Aruba. Su persona mester ‘uphold the law’ y controla p’e no wordo viola! Ami ta di opinion cu p’e acto aki so caba, institui ilegalidad, Parlamento mester pasa Mocion di Desconfiansa contra su persona y retir’e como Ministro di Pais Aruba. Den e reunion aki lo haya sa si fraccion di AVP lo sostene fraccion di MEP y para pa integridad.

Expresionnan haci den e articulo aki no necesariamente ta refleha opinion di ArenaPoliti.co