Ta e maneho. No e persona. 

Siman pasa e patidonan PDR/MEP a entrega un "mocion di desconfiansa" contra di minister di husticia Arthur Dowers. Sinembargo, durante di henter e debate riba criminalidad cu nan mes a pidi pe, oposicion no a presenta critica riba e MANEHO mes. Cu excepcion di e idea di PDR pa usa alarmanan di shete euro, nan no a presenta niun alternativa tampoco pa e MANEHO. Enbez di critica e maneho, oposicion a señala cosnan cu a y ta sosode y nan a critica e minister mes. Logicamnente ta e minister ta esun cu ta tuma desicion y duna direccion. Pa esey e tin cu duna cuenta na Pueblo y na Parlamento. Pero oposicion no a presenta nada cu nan lo haci diferente cu loke ta haci awor. Di Parlamento ta spera cu nan ta bay mas leu cu djis señala kico a sosode. Di parlamento ta spera cu nan ta analisa e MANEHO di e minister y presenta alternativanan pa kico e no mester haci y kico si lo mehora e maneho. Esey oposicion no a haci. Entre otro pesey Rene Herdé di AVP a bisa cu lo comete un eror historico si aproba e mocion di desconfiansa sin cu por bisa kico ta malo y kico tin cu drecha.

E MANEHO, NO E PERSONA 
Den combersacion cu Rene Herdé ela splica pakico ta e MANEHO y no e persona cu mester wordo critica. Rene Herdé: “Bo no ta entrega un mocion di desconfiansa contra di niun minister di niun gobierno facilmente. Esey no ta e funcion di un parlamento. Bo ta haci’e si Bo no ta di acuerdo cu e maneho. E ora Bo ta mustra kico ta malo den e maneho y con pa mehor’e. Si Bo no haci esey e pregunta ta keda, ta pakico Bo kier pa un minister baha. E regla mester ta semper cu Bo ta exigi pa un minister baha ora cu e tuma desicionnan robez of contra ley of comporta contra moral y etica. No tin otro motibo. Si Bo entrega un mocion di desconfiansa pa motibonan politico electoral, anto Bo ta malusa parlamento!”

Segun Rene Herdé oposicion no por a mustra kico tin cu cambia den e maneho di e minister. Oposicion a bisa den pasado cu mester inverti mas placa den husticia. E realidad ta cu for di 2010 gobierno y fraccion di AVP den parlamento a aumenta e presupuesto di husticia gradualmente cu 70 miyon florin! Fraccion di AVP a bisa cu mester habri scol di polis bek y gobierno a habri e formacion di mas polis. Polis a pidi pa duna nan mas autoridad pa haci envestigacion y actua preventivo. AVP a percura pa aproba e ley (BOB) pa duna polis autoridad adicional. Pueblo a pidi pa aumenta gastigonan y AVP a percura pa esey. Pueblo a pidi pa usa mas tecnologia den combati criminalidad, manera camaranan. Gobierno a pone camara y ta bay sigui pone camara na mas luga. Pueblo a pidi pa haci entrada legal y ilegal pa Aruba mas stricto (“controla fronteranan”), e minister di husticia a haci esey. Oposicion a pidi pa instala un radar, pero nan a lubida cu ta nan propio gobierno (MEP) a laga desmantela e radar. Awor ta e radar di Kustwacht di Reino ta haci un bon trabou den cuida nos lamanan. Ta pesey tur dia polis ta gara ilegalnan cu drenta Aruba via lama y ta sacanan di Aruba atrobe. A bin ripara cu mayoria di atraco ta wordo cometi door di hende di Aruba mes. Polis ta soluciona mayoria di e atraconan aki y husticia ta sera e criminalnan aki. Pa hobennan cu por cay den criminalidad AVP a crea e “Formacion Social” cu ta duna nan oportunidadnan nobo riba un bon caminda. Rene Herdé: “Riba e maneho oposicion no a presenta nada cu no a haci caba. Enbez di presenta un otro maneho, nan a ataca e minister mes, sin bisa kico un otro minister lo mester haci diferente. Ta eynan nan a y ta sigui faya.Ta pesey nos lo a comete un eror grandi pa sostene un mocion asina. Tanten cu den politica ta keda ataca e politico y no kico e ta bisa y haci, nos lo keda practica un politica tradicional y inefectivo manera oposicion ta haci. Nan mester siña cu den politica no ta ken ta maneha ta conta na prome luga. Ta kico cu Bo haci ta conta! AVP a y ta sigui usa tur instrumento legal, tur idea of proposicion di ken cu present’e cu por yuda mehora bida na Aruba. Pasobra nos tur stima nos pais y nos sa cu no ta ken pero ta kico ta conta!”

Expresionnan haci den e articulo aki no necesariamente ta refleha opinion di ArenaPoliti.co