Aruba ta den crisis di insiguridad! 

ORANJESTAD - "Aruba ta den crisis, nos no por mas. Nos pueblo ta sclama! Pero pa Minister di Husticia Arthur Dowers tur cos ta normal. Minister Dowers den Parlamento ningun momento a mustra cu e ta preocupa of ta convivi cu comunidad den e momento di crisis aki.

Ela tira culpa riba su coleganan y ningun momento a admiti cu su vision - si acaso e tin un - a faya!
Minister Hooijboer tin culpa cu muchanan no ta caba scol.
Minister Otmar Oduber tin culpa pa trese turistanan problematico Aruba.
Minister Bermudez tin culpa pasobra e no ta duna e Minister placa. Pesey nos ta lamenta cu nos no tin un reunion publico pa cuestiona e Minister na mihor forma.

REUNION PUBLICO
E motibo pakiko nos kier un 'openbare vergadering' ta pa por presenta mocion. Pueblo ta spera cu Parlamento ta bai tuma accion. Accion bo por tuma solamente den un 'openbare vergadering'.

10 MIYON FLORIN
Minister Dowers a laga sa cu desde november 2015 ela manda un carta pa ministerraad pa pidi 10 miyon florin mas pa combati criminalidad. Pero e no a haya oido te ainda.
Pesey nos mester bai den un reunion publico pa nos traha un mocion y kita 10 miyon for di otro caminda pa duna minister Dowers.
Por ehempel di Minister Otmar Oduber cu tin miyones di reserva. Of di Minister Eman cu tin miyones pa biahamento y fiestamento.
Esey ta algo cu Parlamento por hasi facilmente pero no den 'bijeenkomst' pero den 'openbare vergadering'

MOCION DI DESCONFIANSA
Den Comunidad tin hopi vos ta lanta pa Aruba haya un Minister di Husticia nobo.
E Minister aki a crea e ambiente IDEAL pa criminalnan. E Minister aki a faya dor di ignora critica y conseho di otronan.
Ela faya di resolve e escases di polis cu nos tin. Ela faya den convense Gobierno cu un plan pa e haya fondo.
Aki nos ta papia di fayo den liderasgo, boluntad y capacidad. Pa e motibonan valido aki, Minister Arthur Dowers mester tene honor na su mes y tuma su retiro.
Si e no hasi'e, Parlamento por hasi'e p’e den un mocion di desconfiansa. Esaki por solamente den un 'openbare vergadering'.

Nos ta spera cu Presidente di Parlamento yama e reunion publico cu nos a pidi awe mes.
Ta asina so nos ta manda un senjal cla pa criminalnan cu nos ta tuma control y nan no tin control mas.

Expresionnan haci den e articulo aki no necesariamente ta refleha opinion di ArenaPoliti.co